KOVALIMA, 04 Marsu 2025 (TATOLI) – Sekretariu Estadu Formasaun Profesionál no Empregu (SEFOPE), Kovalima, hahú Dezembru 2024 to’o Fevereiru 2025 ne’e rejista ona kandidatu traballadór na’in-438 mak kompleta ona sira-nia dokumentu.
Diretór SEFOPE Kovalima, Stefanus Segundo Manek informa katak kandidatu traballadór ne’ebé kompleta sira-nia dokumentu ne’e kandidatu ne’ebé tuir teste no sira-nia valór Good (Di’ak) ho Verry good (Di’ak liu), hodi rejista iha sistema.
“Kandidatu traballadór ne’ebé mak seidauk iha tempu atu kompleta sira-nia dokumentu ami kontinua hein hodi halo atendementu ba sira, nune’e rejista sira-nia naran iha sistema hamutuk 438 maibé seidauk kompleta”, Stefanus Segundo Manek, dehan ba TATOLI iha-nia servisu Fatin Tabakolot, ohin.
SEFOPE Kovalima halo atendementu ba kandidatu traballadór Austrália bazeia ba simu orientasaun husi SEFOPE nasionál tanba kandidatu sira ne’ebé kompleta dokumentu hetan ona númeru referénsia no rejista ona iha sistema hein empreza sira presiza sira.
Dokumentu ne’ebé kandidatu traballadór presiza atu kompleta mak hanesan Pasaporte, Billeti identidade (BI), Kartaun eleitorál (KE), ‘Bom’ komportamentu, númeru telefone no E-mail (Korreiu-elektróniku) ne’ebé labele reprezenta husi família tanba sistema presiza atu hasai foto nune’e empregadór sira bele haree fíziku husi traballadór sira .
Durante halo atendementu ne’e, ezekutivu ne’e dehan, funsionáriu SEFOPE hasoru difikuldade liña internet iha munisípiu ladun di’ak nune’e funsionáriu SEFOPE labele atende ho lais, tanba halo atendementu depende de’it liña internet bainhira sistema falla funsionáriu labele halo buat ida.
Ho difikuldade ne’ebé iha, dirijente SEFOPE ne’e hato’o agradesimentu ba kandidatu traballadór sira, hein ho pasénsia hodi haree situasaun ne’ebé mak SEFOPE munisípiu enfrenta hodi halo rejistu kandidatu traballadór sira-nia naran iha sistema.
Funsionáriu halo atendementu mai husi SEFOPE nasionál hodi halo rejista kandidatu traballadór kompleta sira-nia dokumentu loron ida atu atende na’in hira ida-ne’e depende de’it husi sistema liña internet; internet la di’ak loron ida atende na’in ida, se di’ak loron ida bele atende na’in-20.
Iha sorin seluk, Kandidatu traballadór, Almerio Alves, dehan katak, nia prezente iha edifísiu SEFOPE Kovalima atu kompleta ninia dokumentu nune’e SEFOPE bele rejista iha sistema bainhira empreza sira presiza nune’e hanesan kandidatu traballadór he’in de’it informasaun husi SEFOPE.
“Ohin ha’u mai iha ne’e atu kompleta ha’u-nia dokumentu sira hanesan Billeti identidade (BI), Kartaun eleitorál, ‘Bom’ komportamentu no seluk ne’ebé mak SEFOPE presiza, tanba ne’ebé mak mai kompleta dokumentu ho valór ne’ebé Good no Verry (good) maibé ha’u-nia valór Good,” nia informa.
Jornalista: Celestina Teles
Editór: Rafael Ximenes de A. Belo
