KOVALIMA, 04 Marsu 2025 (TATOLI) – Diretór SEFOPE Kovalima informa katak daudaun ne’e progresu konstrusaun sentru formasaun dalen inglés, iha Suku Debos, Aldeia Lakonak, Postu administrativu Suai , Munisípiu Kovalima nia progresu fiziku atinji ona 75%.
“Bazeia ba observasaun, konstrusaun sentru formasaun dalen inglés iha Munisípiu Kovalima daudaun ne’e nia progresu implementasaun atinji ona 75%, tanba progresu fíziku traballadór sira taka ona uma kakuluk, revoka no halo instalasaun iha haris-fatin, besik finaliza ona”, Diretór SEFOPE, Stesfanos Segundo Manek, relata ba TATOLI iha nia servisu fatin Tabakolot, ohin.
Dirijente SEFOPE Kovalima ne’e dehan, durasaun tempu konstrusaun formasaun lian inglés ne’e durante fulan neen ne’ebé hahú iha Novembru 2024 finaliza iha Jullu 2025, maibé haree ba progresu servisu Abríl 2025 entrega konstrusaun.
Konstrusaun sentru formasaun dalen inglés la’ós empreza mak halo konstrusaun, maibé formandu husi sentru Senai Bekora uza formandu ne’ebé tuir formasaun konstrusaun sívil iha nível sertifikadu III hodi kompleta sira-nia estudu.
Sentru formasaun ne’e konstrui husi formandu na’in-10 kompostu husi na’in neen mai husi F-FDTL ne’ebé durante ne’e tuir formasaun konstrusaun sívil iha nível sertifikadu III hodi kompleta sira-nia estudu no balun mai husi sentru formasaun Senai Bekora.
Fó hanoin fali katak, Sekretáriu Estadu Formasaun Profisionál no Empregu (SEFOPE) lansa fatuk dahuluk konstrusaun formasaun dalen inglés ne’e iha loron 18 Novembru 2024 ho nia medida 27×8,5 ho sala-de-aula tolu kompleta ho haris-fatin rua.
Konstrusaun sentru formasaun ne’e orsamentu mai husi 2024 ho montante rihun $ 78 mai husi Orsamentu Jerál Estadu (OJE) konstrui durante fulan tolu; hahú 13 Novembru 2024 ne’e.
Jornalista: Celestina Teles
Editór: Rafael Ximenes de A. Belo
