DILI, 04 Marsu 2025 (TATOLI)-Santu Padre Papa Francisco sofre epizódiu rua insufisiénsia respiratóriu aguda nian, haktuir husi Vatikanu, tersa ne’e.
“Ohin, Santu Padre sofre epizódiu rua insufisiénsia respiratória aguda nian, ne’ebé kauza husi akumulasaun signifikativu muco endobronquico no konsekuente
broncoespasmo. Tanba ne’e, halo broncoscopia rua ne’ebé presiza aspirasaun ba sekresaun barak”, Vatikanu informa husi komunikadu imprensa.
“Iha lorokraik, ventilasaun mekániku la invasiva hahú fali. Santu Padre nafatin vizilante, orientadu no kolaborativu. Prognóstiku ne’e sei protejidu nafatin”.
Antes ne’e komunikadu imprensa hosi Vatikanu subliña insufisiénsia renál kmaan ne’ebé Papa Francisco sofre ne’e la’ós preokupante ona. Hodi hatutan terapia oksijéniu kontinua, maski ho fluxu no persentuál oksijéniu lijeiramente hamenus.
“Médiku sira, konsidera komplesidade kuadru klíniku, ho prekausaun seidauk bele halo prognóstiku”, dehan.
Maski iha kodisaun saúde ne’ebé sei krítiku, Papa Francisco iha dadeer (oras Roma nian) nafatin hala’o atividade eukarístika no, iha loraik hala’o nia serbisu. “Iha kalan telefone ba pároku Parókia Gaza hodi espresa nia proximidade paterna. Papa Francisco agradese ba povu hotu ne’ebé iha loron hirak ne’e hamutuk hodi reza ba nia saúde”, konklui.
Lembra katak Santu Padre hahú halo tratamentu saúde iha Ospitál Gemelli, Roma, iha loron 14 Fevereiru 2025 tanba pneumonia bilaterál.
Notísia relevante: Papa Francisco rekupera husi krítiku
Jornalista : Osória Marques
Editora : Rita Almeida
