DILI, 04 Marsu 2025 (TATOLI)—Diretór Servisu Apoiu Diagnóstiku no Terapeútiku iha Ospitál Nasionál Guido Valadares (HNGV-sigla portugés), Vidal de Jesus Lopes klarifika katak atividade konsulta saúde ba komunidade iha suku Ailok, postu administrativu Kristu- Rei, la’ós Governu nian, maibé partidu CNRT nian.
“Ita-nia nasaun ne’e nasaun demokrátika. Ita tenke separa buat ida governasaun ho partidu nian. Entaun, atividade rua ne’e ita tenke tau ketak. Partidu ne’e iha nia tempu no iha nia fatin. Ne’e ita mós tenke hatene. Informasaun ne’ebé espalla iha mídia sosiál dehan ami lori ai-moruk husi HNGV ba halo konsulta masal ne’e laloos,” Vidal ba jornalista sira iha HNGV, tersa ne’e.
Nia esplika katak Klibur Profisionál Departamentu Saúde CNRT ba halo asaun konsulta masal uza orsamentu partidu nian hodi sosa medikamentu konsumável, la’ós lori Governu nia osan.
Nia informa, sira-ne’ebé akuza iha mídia sosiál kona-ba lori medikamentu HNGV ba konsulta ne’e sira iha evidénsia bele relata ba autoridade relevante atu halo investigasaun.
“Sira-ne’ebé akuza ami iha mídia sosiál kona-ba ami lori medikamentu HNGV ba konsulta masal ne’e se sira iha evidénsia bele bá hato’o iha autoridade sira atu halo investigasaun ba ami. Maibé, se sira laiha evidénsia mak ko’alia, ami mós iha direitu atu keixa fali sira,” nia afirma.
Antes ne’e, iha 03 Marsu 2025, Klibur Profisionál Departamentu Saúde partidu Congresso Nacional da Reconstrucão de Timor (CNRT) halo konsulta masal no asaun karitativa iha suku Ailok, iha-ne’ebé marka prezensa mós prezidente partidu CNRT, Kay Rala Xanana Gusmão.
Jornalista: Felicidade Ximenes
Editór: Xisto Freitas da Piedade
