BAUKAU, 05 Marsu 2025 (TATOLI)—Bispu Dioseze Baukau, Dom Leandro Maria Alves, enkoraja sarani Katólika atu halo ezersísiu tolu durante tempu kuarezma.
Dom Leandro Maria Alves liuhosi omília esplika, tempu kuarezma durante loron-40 fó hanoin ba sarani sira atu halo ezersísiu tolu importante mak hanesan orasaun, izmola no jejún tanba Maromak nian domin boot ba ema hodi sakrifika aan liuhusi Jesus Kristu atu kasu ema-nia sala.
“Sinza fó hanoin mai ita atu hatene aan, bolu atensaun mai ita no halo ita rekoñese ita-nia aan ne’ebé ki’ik iha Maromak nia futar oin. Sinza fó hanoin katak ita mai husi rai sei fila bá rai,” Bispu Dioseze Baukau hateten iha Igreja Katedrál Vila Antiga, Baukau, kuarta ne’e.
Dom Leandro salienta katak importante atu sarani sira halo ezersísiu dahuluk mak presiza halo orasaun kada loron tanba nu’udár dalan atu hakbesik aan ba Maromak, hametin relasaun ba Maromak no loke laran liuhosi domin ba Maromak.
Ezersísiu daruak ne’ebé presiza halo durante loron-40 mak, tulun malu liuhusi izmola tanba Maromak halo hamutuk la’ós atu taka aan ba malu liuliu tenke hametin relasaun ho Igreja nune’e bele tulun malu nu’udár sarani Katólika.
Enkuantu, ezersísiu datoluk mak tenke jejún iha tempu kuarezma ne’ebé la’ós signifika tenke redús hahán loron-loron nian ba isin maibé buka solidáriu ba maluk sira-ne’ebé presiza tulun (hahán) tanba tempu barak fó atensaun de’it ba aan rasik hodi la preokupa ema seluk ne’ebé presiza tulun.
“Buka hadame malu entre ita ema tanba bele dame ho Maromak liuhusi fuan ho laran tomak,” Dom Leandro akresenta.
Dom Leandro hateten, loron-Kuarta sinza fó hanoin ba sarani sira katak tempu koarezma durante loron-40 laran iha sentidu tempu ba sarani sira halo renovasaun no prepara aan di’ak liután hasoru festa páskua.
Sentidu husi tempu kuarezma, sarani sira buka sai husi hanoin rasik, buka konverte aan nu’udár ema sala-na’in nune’e bele fila bá Nai Maromak tanba Ninia domin boot nune’e presiza fó laran tomak ba Maromak.
Fila laran ba Maromak, signifika buka atu hatudu sai liuhusi relasaun ho maluk, família no sosiedade hanesan parte husi rekonsiliasaun tanba úniku dalan loos atu halo relasaun ho Maromak.
Jornalista: Natalino Belo
Editór: Xisto Freitas da Piedade
