BOBONARU, 05 Marsu 2025 (TATOLI)—Bispu Dioseze Maliana, Dom Norberto do Amarál, hateten iha tempu Kuarezma nia laran ne’e, sarani sira buka tau prioridade liu ba klamar tanba klamar mak sai pontu determinante ba ema ida-nia moris, atu moris sai di’ak tuir Maromak nia hakarak.
“Ita fó prioridade liu ba ita-nia klamar tanba klamar mak fó moris, halo ita book-aan, hodi halo buat hotu-hotu iha moris loro-loron. Isin laiha folin buat ida, isin iha kuandu klamar iha no ita-nia hanoin atu moris no fó importante liu ba klamar. Tanba, klamar ne’e hela ba nafatin no sei mosu fali iha Maromak nia futar oin hodi halo justisa ba di’ak no aat, atu ita bele halo moris ne’e hotu. Maromak sei husu fila-fali iis ida-ne’e, klamar ida-ne’e, atu sai oinsá depende ba ita-nia responsablidade moris iha mundu ida-ne’e, atu hateke hodi la’o didiak tuir Maromak nia hakarak,” Dom Norberto do Amarál hateten iha omília iha selebrasaun misa kuarta-feira sinzas, iha igreja Pro-Katedrál Maliana, kuarta ne’e.
Prezidente Konferénsia Episkopál Timorense ne’e hatutan, Maromak kuandu halo ema ho tahu, foufoun ema-nia isin ne’e sai nu’udar estátua ida maibé Maromak fó iis ba estátua ne’e book-aan tanba iis ne’e mak sai klamar ne’e.
“Maromak fó mai ita iis atu ita bele moris no halo buat di’ak tuir Maromak nia hakarak, maibé tan de’it ita-nia kakaan, hatene buat hotu hodi hetan kastigu, mate no terus oioin iha ita-nia moris loro-loron ninian. Maibé, domin Maromak nian boot tebe-tebes no Maromak la husik ita iha terus ho sala ba mate ida-ne’e,” nia hateten.
Ne’eduni, nia dehan, sarani sira presiza hanoin fali kona-ba moris ida-ne’e katak moris ida-ne’e la’ós isin de’it maibé ho klamar, tanba klamar ne’e importante liu.
“Maromak fó ida-ne’e, konvida ita nia-aan atu konverte ita nia-aan ba dalan di’ak, ida-ne’ebé hanorin la halo tuir Maromak nia ukun fuan ba moris, tuir Maromak nia hakarak. Ida-ne’e, buka atu konverte ninia-aan hanesan profeta Joel ne’ebé fó oin mai ita, fila ita-nia laran no ita-nia neon. Mai ha’u, Maromak hodi halo jejun,” Dom Norberto hateten.
Aleinde ne’e, nia dehan, iha tempu kuarezma ne’e sarani sira atu halo orasaun, izmola, jejún no peniténsia, tanba ida-ne’e sinál di’ak ba ita isin no klamar.
“Kada sesta-feira iha tempu kuarezma nia laran ne’e, sarani sira tenke halo peniténsia, labele han naan. Tau sinál ahi-kadesan ba ita-nia reen-toos, ne’e sinál de’it, ita halo sakrifisíu, orasaun, ita halo di’ak hotu-hotu di’ak iha tempu kuarezma, atu ita moris di’ak iha ita-nia moris no kna’ar loro-loron nian durante tinan ida-nia laran,” nia dehan.
Dom Norberto hateten, Kuarta-Feira Sinzas hanoin kona-ba tau ahi-kadesan iha reen-toos atu fó hanoin ba sarani sira kona-ba isin, katak ema mai husi rai-rahun sei fila-fali ba rai-rahun, isin ema ida-idak nian ne’e simu husi Maromak.
Husi buat ne’ebé laiha ba buat ne’ebé iha, maibé isin ida-ne’e ema bele hadomi liu fali hodi buka aumenta nia, tuir fali buat sira selu-seluk hodi haluha tiha buat ida ensensíal ba ema-nia moris katak klamar ne’e moris no iha.
Notísia Relevante: Bispu Dioseze Maliana husu polítiku sira evita liafuan ofende ema seluk
Jornalista : Sérgio da Cruz
Editór : Cancio Ximenes
