DILI, 05 Marsu 2025 (TATOLI)-Governu Timor-Leste liuhusi Minisru Ensinu Superiór Siénsia no Kultura (MESSK), José Honório, ho nia Omologu Indonéziu, Brian Yuliarto, hodi ko’alia konaba pontu importante neen.
Enkontru ne’ebé realiza iha salaun Ministeriu Ensinu Superiór, Siensia no Teknolojia Indonézia, akompaña husi Embaixadór Timor-Leste ba Indonézia, Roberto Sarmento de Oliveira Soares, Diretór Ezekutivu Fundu Dezenvolvimentu Kapitál Umanu (FDCH, sigla portugés), Júlio Aparício.
Ministru José hatete pontu neen ne’ebé sira ko’alia mak, ida fasilita estudante Timoroan sira atu hetan vistu estudante (KITAS) nune’e mos extensaun durasaun vistu estudante nian (lisensa atu hela ba estudante Timoroan sira iha Indonézia). Porezemplu, durasaun vistu estudante ba estudante lisensiatura nian bele fó tinan duke tinan ida, no estudante maestradu nian tinan rua no estudante doutoramentu tolu.
Pontu rua mak apoia kapasitasaun rekursu umanu iha Timor-Leste liuhusi programa interkambiu ba estudante no dosente sira, peskiza hamutuk, publikasaun sientífiku, no realiza semináriu internasionál hamutuk. Tolu mak posibilidade apoiu bolsa estudu ne’ebé espesifiku ba grau doutoramentu husi Instituisaun Ensinu Superiór Indonézia nian sira ne’ebé rekoñesidu durante ne’e tantu iha nasionál no mós internasionál.
Haat mak presiza reforsa Timor-Leste nia ligasaun ho instituisaun ensinu superiór sira seluk iha nasaun sira no kontinente aziatika, espesialmente nasaun sira ne’ebé hola parte iha ASEAN. Lima mak apoia Timor-Leste iha dezenvolvimentu siénsia no teknolojia liuhusi program bolsa estájiu profesionál ba informasaun iha empreza sira ba área informasaun no teknolojia, laboratóriu sientífiku ba estudante foinsa’e sira. Ikus mak halo akreditasaun konjunta/hamutuk ba peskiza akadémika entre Institutu Nasionál Siénsia no Teknolojia (INCT) no Badan Riset dan Inovasi Nasional (BRIN).
Nia hatutan, “Ministru Ensinu Superior, Siénsia no Teknolojia Indonézia nian konfirma pozitivamente apoiu no koloborasaun ne’ebé mak Ministru Ensinu Superiór, Siénsia no Kultura Timor-Leste nian propoin durante enkontru hanesan estabelesimentu vistu estudante nian ho tinan naruk ba estudante lisensiatura, mestradu no doutoramentu, oferta bolsa estudu ne’ebe espesifiku ba área doutoramentu, apoiu iha programa peskiza sientifika konjunta, estabelesimentu eskola doutorál, promove kolaborasaun universitária (university to university) no programa estájiu ba estudante no programa interkámbia ba dosente universitáriu sira”.
Akordu sira ne’e sei rekonsidera iha revizaun memorandu entendimentu ne’ebé mak Governu rua asina ona iha lideransa anteriór
Notísia relevante: PR Horta husu Embaixadór Roberto hametin relasaun bilaterál entre TL-Indonézia
Jornalista : Osória Marques
Editora : Rita Almeida
