VIKEKE, 05 Marsu 2025 (TATOLI)-Vigáriu parokia Nossa Senhora de Fátima Uatulari, Pe. Cimpliu Bau Mali, SVD, uma kreda husu sarani-sira halo jejún no hadera-aan iha tempu kuarezma.
“Durante loron 40 nian laran kreda husu sarani-sira hotu halo jejún no hadera-aan ne’e sai importante iha ita-nia moris. Ho esperansa ida katak ita bele prepara aan ba festa paskua nian, kona-ba esperiénsia husi terus, mate no moris-hi’as ne’ebé Jesus hatudu ba ita,” Pe. Cimpliu Bau Malu, hateten iha nia omília liuhusi selebrasaun misa kuarta-feira Sinzas, iha igreja parokia Nossa Senhora de Fátima Uatulari, ohin.
Nia hatutan, sinzas (ahi-kadesan) hanesan sinál ida katak ema mai husi rai, sei fila ba rai nune’e sarani-sira simu sinzas hakribi imi (sarani) nia sala no fiar ba evanjellu.
Ba sarani-sira, nia dehan, misa ida-ne’e fó hanoin ba sarani sira atu hatene Nai Nia laran luak ba mizerikordia.
“Tanba, NAI mak halo ita, NIA mak simu ita, atu ita bele hetan grasa husi NAI. Tan ne’e, kontinua ezije ita nafatin fiar ba Maromak,” nia dehan.
Tuiir nia, tempu kuarezma sai esensiál atu rona Nai nia liafuan hodi haklaken fiar nian iha sarani ida-idak nia moris.
“Iha tempu kuarezma, ita labele hirus ena. Ita labele bosok malu no labele tolok ema. Ita tenke hadera-aan iha tempu kuarezma. Iha kuarezma, ita tenke hadi’a aan no halo orasaun hodi ita moris hakmatek, hetan grasa no bensaun husi Maromak. Na’n husu ba ita hotu-hotu labele halo festa iha tempu kuarezma. Iha tempu kuarezma, ita tenke halo esmola ka karidade,” nia hateten.
Jornalista : Vitorino Lopes da Costa
Editór : Cancio Ximenes
