Abitante 3.220 iha Vikeke halo ona resenseamentu eleitorál ho sistema Biométriku
VIQUEQUE, 06 Marsu 2025 (TATOLI)—Diretór Sekretáriadu Tékniku Administrasaun Eleitorál (STAE) munisípiu Vikeke, Humberto Fernandes, informa abitante husi munisípiu Vikeke hamutuk 3.220 mak halo ona resenseamentu eleitorál ho sistema Biométriku.
“Ita hahú lansa iha Novembru 2024 halo atendimentu ba eleitór sira, muda kartaun sistema foun sistema Biométriku to’o agora ita halo atualizasaun kartaun eleitorál ba sistema Biométriku hamutuk 4.509. Husi númeru ne’e, eleitór hamutuk rihun 3.220 ami prodús ona kartaun Biométriku no entrga ona ba eleitór sira. Daudaun ne’e, eleitór 1.289 mak sei prosesu verifikasaun eleitór sira-nia dokumentu, depois prosesu verifikasaun ramata hafoin ami print out sira-nia kartaun Biométriku,” Diretór STAE munisípiu Vikeke hateten ba Tatoli, iha ninia kna’ar fatin Vikeke Vila, ohin.
Nia hateten, prosesu muda kartaun ba sistema biometriku, eleitór sira-ne’ebé muda kartaun sira hatama dokumentu Billete Identidade (BI), sertidaun moris no kartaun semi eleitorál ba STAE, depois STAE Vikeke tenke halo verifikasaun ba dadus eleitór sira-nia no haruka ba servidór STAE nasionál.
“Bainhira dadús eleitór sira-nia loos, hafoin haruka fali mai ami mak foin ami print out kartaun biométriku, hodi distribui ba ita-nia eleitór sira. Tanba ne’e, eleitór husi 4.509, ita foin print out kartaun biométriku 3.220 no eleitór 1.289 ami hatama ona ba sistema, agora sei iha prosesu verifikasaun,” nia dehan.
Tanba ne’e, nia dehan, atendementu ba sistema biométriku rigór STAE presiza halo verifikasaun dokumentu eleitór sira-nian, kuandu dokumentu sira-ne’e loos hotu mak STAE foin emprime kartaun biométriku.
Kona-ba atendementu sistema biométriku, nia dehan, iha faze dahuluk atende ba funsionáriu sira iha munisípiu Vikeke, maibé daudaun STAE halo atendementu ba abitante sira-ne’ebé hakarak muda kartaun ba sistema biométriku ne’e.
“Iha fou-foun ita lansa sistema biométru ne’e ita fó uluk biban ba ita-nia funsionáriu sira, maibé agora ami halo atendementu ba eleitór sira iha munisípiu Vikeke. Atendemente ne’e mákina emprime ida de’it, ne’ebé ita atende iha munisípiu de’it. Ba postu administrativu seidauk, ne’ebé komunidade ne’ebé husi postu sira hakarak muda kartaun eleitorál mai direta iha edifísiu STAE Vikeke,” nia hateten.
Aleinde ne’e, nia dehan, kartaun eleitorál semi biométriku ne’ebé daudaun ne’e iha sei funsiona, hodi hein date line husi STAE.
“Nune’e, ha’u nafatin hato’o ba eleitór no instituisaun sira katak kartaun semi biométriku ne’ebé iha, sei funsiona. Tan ne’e ita hein date line husi STAE sai ona mak kartaun semi biométriku sira ne’e foin la funsiona,” nia dehan.
Enkuantu, atendementu ba kartaun biométriku hahú segunda, kinta no sesta, ekipa STAE halo relatóriu ba nasionál.
Daudaun ne’e, ekipa tékniku STAE munisípiu Vikeke hamutuk na’in-hitu (7) mak fó atendementu ba eleitór sira iha munisípiu Vikeke.
Jornalista : Vitorino Lopes da Costa
Editór : Cancio Ximenes
