DILI, 06 Marsu 2025 (TATOLI) – Governu sei halo konstrusaun, iha tinan ne’e, estrada husi Lautein bá Lospalos no Lautein bá Com, informa Prezidente Autoridade Munisípiu Lautein, Mélio de Jesus.
Nia dehan katak prosesu hothotu iha ona Komisaun Nasionál Aprovizionamentu (CNA, sigla portugés) no konkursu públiku loke ona, hein de’it emreza manán-na’in atu halo konstrusaun.
“Tuir informasaun ne’ebé ha’u rona husi Ministru Obra Públika, Samuel Marçal, katak iha Abríl la’e Maiu tinan ne’e sei halo lansamentu fatuk dahuluk ba konstrusaun nian”, Mélio de Jesus adianta ba Tatoli iha Ministériu Finansa, ohin.
Tuir nota ne’ebé Tatoli asesu, Primeiru-Ministru, Xanana Gusmão, hamutuk ho Ministru Obra Públika, Samuel Marçal, hala’o, iha loron 01 Marsu 2025, sosializasaun kona-ba projetu konstrusaun estrada ba populasaun afetada sira iha Lautein.
Mega projetu ne’ebé tinan ne’e Ministériu Obra Públika (MOP) sei implementa iha Lautein hamutuk tolu mak konstriusaun estrada husi postu administrativu Lautin bá Lospalos Vila hamutuk kilómetru 28 ho totál orsamentu millaun $22, estrada husi postu administrativu Lautein bá Suku Com hamutuk Kilómetru 20 ho orsamentu millaun $14 no Projetu Bee Moos ho orsamentu millaun $17 ne’ebé sei benefisia uma-ka’in 3.400.
Nota ne’e salienta katak Primeiru-Ministru, Xanana Gusmão, husu ba populasaun atu fó apoiu bá programa Governu nian hodi implementa lalais projetu tolu ne’e, nune’e populasaun
Xanana Gusmão observa katak problema prinsipál populasaun nian maka infraestrutura bázika hanesan estrada, tanba ne’e Governu prioritiza projetu konstrusaun estrada iha tinan ida-ne’e maski ho fazeadamente.
Nune’e mós Ministru Obras Públika, Samuel Marçal, hateten molok implementa projetu tolu ne’e Governu iha devér atu halo sosializasaun no hakarak rona husi komunidade afetada sira.
“Labele halo impedimentu no espera katak, povu iha Lautein sei sai ezemplu ida ne’ebé di’ak liu bá munisípiu sira seluk. Ita hein katak iha fulan-Maiu tinan ne’e sei konvida Primeiru-Ministru mai hamriik iha povu Lautein nia-oin hodi halo lansamentu bá konstrusaun estrada ne’e”, Samuel Marçal hateten.
Durante iha diálogu ne’e, autoridade lokál no komunidade afetada sira deklara prontu atu koopera ho Governu no prontu atu simu dezenvolvimentu.
Jornalista: Arminda Fonseca
Editora: Maria Auxiliadora
