VIKEKE, 06 Marsu 2025 (TATOLI)—Ekipa Ministériu Administrasaun Estatál (MAE) liuhusi di Diresaun Jerál Simplifikasaun Administrasaun Lokál, kinta ne’e, atuliza dadus portál munisipál ba autoridade no diretór sira iha munisípiu Vikeke.
Reprezentante Diretór jerál Dezentralizasaun no Governu Lokál husi MAE, Elviro Bonaparte, hateten prezensa ekipa MAE mai munisípiu Vikeke ho objetivu atu atualiza fila-fali dadus portál munisipál nian, hodi haree ba dadús munisípiu Vikeke nian ne’ebé antes ne’e aprezenta ba nasioná, maibé dadus balun seidauk kompleta entaun MAE mai halo konfirmasaun de’it.
“Ohin, ami mai halo komfirmasaun dadus munisípiu Vikeke, tanba dadus sira-ne’e ami simu ona maibé husi fontes oioin, balun husi autoridade munisípiu no diretór sira. Entaun dadus sira-ne’e ami haree dadus balun númeru la hanesan. Tan ne’e maka ami mai hasoru direta autoridade no diretór sira atu atuliza dadus munisípiu nian ho loloos,” Elviro Bonaparte hateten iha abertura atualizasaun dadus portál munisipál iha salaun munisipál Vikeke, ohin.
Dadús ne’ebé submete ne’e, balun sei falta no presiza hodi kompleta mak hanesan divizaun administrativu kada postu administrativu, númeru populasaun ho diresaun servisu munisipál Saúde, Edukasaun ho Agrikultura.
“Prosesu aprezenta dadus sira-ne’ebé atu submete ba nasionál iha dalan rua (2) mak bele liuhusi eletroniku liuhusi ofisiál IT munisípiu no dokumentu tenke hetan asinatura husi PAM mak haruka ba nasionál, atu ami simu karik dadus ne’ebé loos no kredivél. Nune’e, ita tau ba portál munisipál, atu bele fasilita ema seluk hodi asesu ba informasaun dadus munisípiu Viqueque nian, liuhusi portál munisipál Vikeke iha Google,” nia hateten.
Prezidente Autoridade Munisípiu Vikeke, Francisco C.S de Gonzaga Soares, hato’o agradesimentu ba ekipa MAE ne’ebé mai halo konfirmasaun dadus portál munisipál nian, tanba ho presenza ekipa MAE nian bele ajuda autoridade no diretór sira hodi haree dadús munisípiu Vikeke nian.
“Ha’u hato’o agradesimentu ba ekipa MAE nasionál bele mai halo konsultasaun dadus ba autoridade no diretór sira tanba durante ne’, dadus sai preokupasaun ba ita. Tanba ne’e, ita presiza servisu ho sériu atu nune’e bele rekolla dadús ho kredibél hodi ba aprezenta ba nasionál,” nia dehan.
Entretantu, partisipa iha atualizasaun dadus portál munisipál hetan partisipa husi Autoridade Munisipál, Diretór, Xefe Departamentu, administradór postu lima ho tékniku postu administrativu lima (5), aktualiza dadus portál munisipál ne’e durante loron ida (1) nia laran.
Jornalista : Vitorino Lopes da Costa
Editór : Cancio Ximenes
