DÍLI, 06 Marsu 2025 (TATOLI)-Sekretáriu Estadu Komunikasaun Sosiál (SEKOMS), Expedito Dias Ximenes konsidera katak meiu komunikasaun sosiál, tantu privadu no públiku, hanesan pilar importante ida ba Timor-Leste (TL).
“Mídia ne’e importante, sai pilar demokrasia, pilar ba unidade nasionál no mós pilar promosaun Timor-Leste ba mundu, no mundu sei koñese Timor-Leste husi uluk to’o agora tanba papél mídia nian”, Sekretáriu Estadu Komunikasaun Sosiál, Expedito Dias, hateten, ba jornalista sira, hafoin enkontru ho grupu Tony Blair hodi halo avaliasaun ba Planu Programa Promosaun Turizmu Timor-Leste (PPTTL) 2024, iha sala reuiniaun DNPNM-SEKOMS, Palásiu Governu, Kinta ne’e.
Expedito reforsa tan katak, bainhira iha atividade ne’ebé de’it mídia mak tenki halo kobertura ba atividade sira hodi espalla ba públiku hodi hatene.
“Atividade iha ne’ebé de’it atu eventu boot ka barak to’o iha ne’ebé mós nafatin mídia mak halo kobertura, nune’e buat ne’ebé povu lahatene katak laiha signifikadu. Entaun povu presiza hatene atividade sira ne’ebé la’o ne’e”, nia reiteira.
Governante ne’e mós esplika katak mídia nu’udar meiu atu halo promosaun ba setór oioin no dezenvolvimentu Timor-Leste liuhusi divulgasaun informasaun ba públiku.
“Tanba ne’e liuhusi atividade ohin nian atu haree mós kona-ba resepsaun mídia nian liuliu promosaun área turizmu, kultura, desportu, edukasaun, tantu mídia rasik ba iha mundu”, nia informa.
Tanba ne’e, tuir SEKOMS, jornalista sira tenki orgullu. Tanba, hanesan mídia tenke independente, nafatin públika no promove Timor-Leste ba mundu.
Entretantu, avaliasaun ba PPTTL 2024 realiza ho objetivu atu avalia impaktu potensiál ambientál, sosiál no ekonómiku sira husi polítika planu no programa promosaun turizmu Timor-Leste 2024.
Atu avalia prosesu operasionál PPTTL-2024 hodi identifika área obstákulu sira no potensiál ba hadi’a hodi ikusmai bele otimiza liu dezempeñu liuhusi mudansa sira ne’ebé sujere ba: sistema sira, prosedimentu sira no alokasaun rekursu sira, hodi atinje efisiénsia no efikásia boot liu iha atinjimentu organizasaun programa nian.
Jornalista: Alexandra da Costa
Editór: Rafael Ximenes de A. Belo
