Xanana atualiza progresu servisu ba Xefe Estadu
DILI, 06 Marsu 2025 (TATOLI)–Primeiru-Ministru, Kay Rala Xanana Gusmão, kinta ne’e, hasoru malu ho Prezidente Repúblika José Ramos Horta hodi relata progresu servisu Governu nian ne’ebé hala’o durante fulan-Fevereiru no Marsu, iha Palásiu Prezidensiál Prezidente Nicolau Lobato, Bairru Pite, Dili.
“Mai atu informa ba Prezidente Repúblika katak momentu ida-ne’e Governu hala’o hela semináriu iha munisípiu rua inklui Dili. Ha’u ba ona Lautein no Ermera hasoru malu ho setór privadu sira atu bele kurije ona saida mak durante ne’e la loos. Hanesan iha Ermera, ha’u ko’alia atu halo estrada maibé tenke selu kompensasaun ba Kafé ho osan ne’ebé karun, maibé grasa de deus tanba ema sira iha Ermera konkorda ona atu loke luan sira-nia estrada,” PM Xanana hateten ba jornalista sira hafoin ramata enkontru.
Iha Ermera, nia dehan, alargamentu ba estrada ne’e komunidade konkorda ona no tempu besik atu hahú loke tan estrada tanba Timor-Leste nia rai ne’e fraku tebes, nune’e udan uitoan ne’e kamioneta boot sira liu estrada ne’e afeta ba rai monu, entaun estrada teke loke luan.
Nia hatutan, iha Dili konsege hasoru malu ona ho emprezariu ba empreza sira hotu atu haree ba futuru oinsá hadi’a fallansu hotu ne’ebé akontese ona iha pasadu.
“Ita ko’alia ho sira atu haree ba buat ne’ebé halo sala ona iha tempu sira liu-ba karik, agora ita tenke kurije iha tinan hirak mai oin ne’e. Hanesan uluk, tuir informasaun iha ADN (Agência Dezenvolvimentu Nasionál) CNA Komisaun Nasionál Aprovizionamentu MOP (Ministériu Obra Públika) bainhira empreza balun manán projetu ida-ne’e, ida ne’ebá servisu la la’o mós nia kaer nafatin tanba osan tama subar husi kotuk. Ida-ne’e mak ha’u dehan ona iha parte tolu ne’e sé mak husu osan ba empreza sira fó hateten ha’u hodi ha’u hasai kedan, ema sira hanesan ne’e la serve atu servisu,” nia dehan.
Tuir Xanana, tenke rigorozu atu nune’e bele tulun emprezariu timoroan sira atu iha kbiit hodi hala’o servisu hodi dezenvolve ekonomia Timor-Leste.
“Atu dezenvolve ekonomia la’ós Governu maibé setór privadu, ida-ne’e mak ha’u hato’o ba Prezidente Repúblika, atu ita bele dudu no kurije sala hirak ne’ebé akontese to’o agora. Ita-nia problema ida tan mak atu dudu ita-nia ekonomia iha tinan ida-ne’e maibé iha problema barak ne’ebé ita atu rezolve. Maibé, prepara daudaun ona iha 2026 ita bele harii banku ida atu tulun ita-nia setór privadu sira iha, iha empreza mikro, pekena, media atu ita bele dudu ona ita-nia ekonomia ba oin,” nia hateten.
Jornalista : Hortencio Sanchez
Editór : Cancio Ximenes
