DILI, 06 Marsu 2025 (TATOLI)—Primeiru-Ministru, Kay Rala Xanana Gusmão, kinta ne’e, hala’o enkontru semanál ho Prezidente Repúblika, José Ramos Horta, hodi ko’alia kona-ba oinsá atu halo transferénsia pasiente sira bá halo tratamentu saúde iha Atambua, Indonézia.
Hanoin ida-ne’e tranzmite husi Prezidente Repúblika, José Ramos Horta ba Primeiru-Ministru, Xanana Gusmão, iha Palásiu Prezidensiál, Bairru Pité, Dili.
“Prezidente dehan, tempu balun nia liubá Atambua, sei ko’alia ho ministru atu haree kona-ba ne’e. Ospitál Atambua iha kapasidade téknika, tan ne’e karik iha moras ruma ne’ebé ita labele kaer, bele transfere bá Atambua,” Xanana Gusmão deklara ba jornalista.
Xefe Governu esplika, karik haruka pasiente referál bá Atambua, bele hamenus kustu ba tratamentu no atendimentu sira.
“Duké haruka pasiente sira bá Singapura, Malázia, Siloam Jakarta, iha-ne’ebé tinan ida ho kustu millaun ba millaun, ita labele selu buat hotu,” nia afirma.
Aleinde ne’e, Governu mós iha planu atu koopera ho Brunei Darussalam iha setór saúde, hodi hasa’e kapasidade rekursu umanu.
“Ami mós ko’alia kona-ba kooperasaun ho Brunei tanba iha Brunei sira halo tratamentu ho di’ak. Entaun, ita bele koopera ho Brunei iha setór saúde hodi fó formasaun ba médiku timoroan sira,” Xefe Governu dehan.
Nia hatutan katak Governu sei koopera ho Brunei hodi fó formasaun sirúrjika ba espesialista kardiáku sira, durante fulan neen to’o tinan ida.
“Médiku sira bele aprende oinsá atu halo operasaun ne’ebé loos, nune’e sira bele sai espesialista ba moras fuan, nune’e ita la presiza haruka pasiente moras fuan bá iha Malázia, Singapura, Siloam no Austrália,” nia konklui.
Jornalista: Felicidade Ximenes
Editór: Xisto Freitas da Piedade
