VIKEKE, 07 Marsu 2025 (TATOLI)—Diretór Servisu Sekretária Estadu Formasaun Profisionál Empregu (SEFOPE) munisípiu Vikeke, Norberto Pereira Martins, informa inisiu fulan-Janeiru to’o Dezembru 2024 ne’e SEFOPE Vikeke rejista kazu disputa laborál hamutuk ualu (8) ne’ebé traballadór sira keixa iha edifísiu SEFOPE munisípiu Vikeke.
“Iha tinan 2024 ami rejista kazu disputa laborál hamutuk hitu (7) no iha tinan 2025 kazu ida (1), ne’ebé kazu totál hamutuk ualu (8) mak ami prosesa. Ita-nia traballadór mai hato’o keixa, ami halo mediasaun ba empreza no traballdór maibé iha prosesu mediasaun entre parte rua la konkorda ba malu, ami tenke lori komisaun arbritajen nasionál mak buka rezolve,” Diretór SEFOPE ne’e hatete ba Agência TATOLI iha nia kna’ar fatin administrasaun munisipál Vikeke, ohin.
Nia dehan, kazu disputa laborál ne’e akontese entre traballadór no empregadór mosu dezintendimentu iha servisu fatin, entaun traballadór sira halo keixa mai SEFOPE nune’e ofisiál SEFOPE bolu entre empregadór no traballadór hodi halo mediasaun.
“Iha prosesu mediasaun entre empregadór no traballadór la simu malu hodi rezolve ita tenke prosesu ba diresaun arbitrajen hodi prosesa. Nune’e, kazu ne’ebé ita rejista hamutuk ualu (8) ne’e kazu hamutuk neen (6) mak konsege resolve. Kazu ida (1) mak sei prosesu no kazu ida (1) mak traballadór no empregadór hakarak lori malu ba arbitrajen. Kuandu ba ne’ebé mak kontinua la simu malu, finál ne’e iha tribunál foti desizaun,” nia dehan.
Nia relata, tipu kazu disputa laborál hamutuk ualu (8) ne’ebé SEFOPE rejista maioria viola saláriu, nune’e traballadór sira mai hato’o keixa iha SEFOPE Vikeke.
Tanba ne’e, nia husu traballadór sira iha munisípiu Vikeke nafatin kumpri regra sira-ne’ebé empregadór sira estabelese iha servisu fatin, atu nune’e traballadór no empregadór sira labele keixa malu.
“Tan ne’e, ha’u hakarak fó hanoin ba traballadór sira katak servisu tanba osan maibé empreza sira mós iha regra nune’e atu servisu karik labele kontra ema-nia regra. Empregadór buka osan hodi selu ita-nia traballadór sira, atu servisu tenke kumpri regra serbisu,” nia hateten.
Nune’e mós, nia husu ba empregadór sira labele viola traballadór sira-nia diretu saláriu mínimu $115, karik empregadór sira selu la to’o, traballadór iha direitu hato’o keixa ba SEFOPE hodi buka solusaun.
Jornalista : Vitorino Lopes da Costa
Editór : Cancio Ximenes
