DILI, 07 Marsu 2025 (TATOLI) – Governu autoriza halo despeza relasiona ho programa kona-ba implementasaun Projetu Tasi Mane iha Kosta Súl nasaun nian ho montante $40.500.000.
Ministru Petróleu no Rekursu Minerál, Francisco Monteiro, esplika katak kona-ba pedidu ba autorizasaun ba despeza ne’e, tanba projetu ne’e nia orsamentu iha ona Fundu Infaestrutura.
Nia salienta katak hafoin ida-ne’e Ministériu Planeamentu Investimentu no Estratéjiku, liuhusi Komisaun Nasionál Aprovizionamentu (CNA, sigla portugés) sei lansa konkursu internasionál ida hodi buka kompañia atu buka solusaun ba funsionamentu projetu boot rua ne’ebé atu lansa mak hanesan parte ida husi Projetu Tasi Mane nian.
“Totál orsamentu daudaun ita aloka millaun $36 husi millaun $40-resin ne’e, maibé liuhusi konkursu mak ita sei hatene ninia kustu loloos ne’e hira no modelu finansiamentu, modelu partisipasaun Timor-Leste nian oinsá mak ita ajusta filafali iha futuru”, ministru dehan iha Palásiu Governu, ohin.
Nia esplika katak projetu rua (autoestrada husi Zumalai bá Natarbora no Suai Supply Base) ne’e importante tebes tanba iha kontestu agora negosia, nomós atu asegura kadoras Greater Sunrise mai Timor-Leste.
“Entaun, infraestrutura rua ne’e mak sai infraestrutura fasilitadór ne’ebé permite sasán sira bele mai husi Suai Supplay Base forma hotu iha ne’ebá mak liuhusi autoestrada ne’e mak lori bá Natarbora hodi konstrui refinaria petrokímika, planta enerjia no kadoras ne’e rasik”, dehan.
Notísia relevante: Timor GAP indemniza komunidade afetada ba Projetu Suai Supplay Base
Jornalista: Arminda Fonseca
Editora: Maria Auxiliadora
