KOVALIMA, 07 Marsu 2025 (TATOLI) – Servisu munisipál administrasaun rekursu umanu (SMARU) públika ona rezultadu selesaun dokumentu ba kandidatu ne’ebé mak submete dokumentu hodi konkore vaga ba ajente administrasaun Públika, iha munisipiu Kovalima.
Rezultadu ne´e, konkorrente ne´ebé nia dokumentu pasa iha selesaun hamutuk na´in- 308 no 182 mak la pasa husi totál konkorrente 409.
Diretór munisipál administrasaun rekursu umanu, José Manuél Gonçalves, informa, Autoridade Kovalima fó sai ona rezultadu selesaun dokumentu ne’ebé nia rezultadu hatudu katak konkorente na’in-182 mak la pasa iha selesaun dokumentu ba vaga ajente administrasaun públika.
“Vaga ne’ebé mak foin lais ita fó sai husiAdministrasaun munisípiu Kovalima liuhusi rekursu umanu loke ba kategória tolu mak hanesan Enjiñeiru Sívil, Arkitetura no Administrasaun-finansa”, José Manuél Gonçalves dehan ba jornalista sira iha resintu AMC, ohin.
Ho nune’e nia dehan, autoridade Kovalima anúnsiu konkursu públiku vaga ba ajente administrasaun públika bazeia ba despaixu númeru 13862/2024/CFP .
SMARU loke vaga ne’e ba Enjiñeiru sívil grau C na’in-neen, Enjiñeiru arkitektura grau C na’in-neen, Ofisiál finansa grau C na’in-neen, Tékniku apoiu servisu finansa munisipál grau D na’in-16 no apoiu administrasaun jerál grau E na’in-17
Konkorrente 308 pasa iha selesaun dokumentu
Dirijente ne’e esplika katak, bazeia ba vaga konkursu públiku sidadaun ne’ebé mak submete sira-nia dokumentu hamutuk 490. Husi númeru ne’e, konkorrente ne’ebé mak pasa iha selesaun dokumentu hamutuk 308 no la pasa 182.
Hafoin publika rezultadu selesaun dokumentu, konkorrente ne’ebé pasa sei kontinua tuir teste eskrita. Bazeia ba planu sei hala’o iha 20 Marsu 2024 iha Komisaun funsaun públika, maibé posibilidade sei adia tanba atu simu vizita husi Prezidente Repúblika ho Primeiru-Ministru iha Marsu ne’e.
SMARU halo rekrutamentu bainhira konkorrente ne’ebé pasa sira-nia orsamentu prevee ona iha orsamentu Jerál Estadu (OJE) 2024 hamutuk rihun 30-resin.
Jornalista: Celestina Teles
Editór: Rafael Ximenes de A. Belo
