DILI, 07 marsu 2025 (TATOLI)—Prezidente Autoridade Munisípiu (PAM) Likisá, Paulino Ribeiro, hasai ona Sirkular Nú. 28/GPAM-LIQ/II/2024, 13 Fevereiru, hodi garante hadook aan husi problema sosiál no garantia bairru moos no saudável, evita problema sosiál hodi la perturba movimentu sirkulasaun transporte Tibar-Loes no Atabae Batuboro Motaain, ne’ebé ameasa seguransa moris ema-nian no ai-horis populasaun nian.
Sirkular ne’e bazeia ba, Dekretu-Lei Nú. 33/2008, loron 27 Agostu, kona ba Ijiene no Orden Públika.
Despaixu Prezidente Autoridade Munisipal Likisá Nú: 116/GPAM-LIQ/V/2024, loron 2 Maiu 2024, Kona ba Nomeasaun Ekiipa operasaun konjunta ba animál iha área urbana husi suku Tibar, Ulmera, Motaulun, Lauhata, Maumeta, postu administrativu Bazartete, suku Dato, Loidahar postu administrativu Likisá, Suku Vatubou, Vaviquinia, Gugleur, postu administrativu Maubara no Vatuboro postu administrativu Loes;
“Dekretu Lei Nú. 33/2008, loron 27 Agostu, kona ba Ijiene no Ordem Públika no Sirkulár Prezidente Autoridade Munisipál Likisá Nú. 28/GPAM-LIQ/II/2024, 13 Fevereiru 2024, hodi garante bairru moos no saudavel no hado’ok-aan husi problema sosiál,” refere nota ne’ebé Agência TATOLI asesu husi Autoridade Munisípiu Likisá, ohin.
Sirkulár ne’e husu ba populasaun Likisá hotu no ema husi Munisípiu ne’ebé de’it atu ba fatin Turizmu Komunitáriu husi Tibar-Loes ne’ebė mai husi Dili, Ermera no Bobonaru ka fatin seluk-seluk tan labele halo foer fatin turizmu sira iha tasi ibun sira.
“Vizitór lokál/doméstika tantu internasionál sira-ne’ebé hakarak mai vizita no halo paseiu ou passa feria semanál ka iha loron Domingu ka loron boot iha fatin Turizmu Komunitáriu ne’ebé agora daudaun Autoridade Munisipál Likisá prepara iha tasi ibun Tibar, Ulmera, Kaitehu Suku Motaulun, Lauhata, Maumeta no Dato-Leopa Tasi ibun Likisá, Maubara to’o Suku Vatuboro Postu Administrativu Loes husu atu kumpre regra Ambientál nian,” tenik iha nota ne’e.
Kritéria sira
- Labele soe foer arbiru no sunu ahi iha ai-horis sira iha aredór tasi ibun ka aredór Turizmu Komunitáriu sira, viajen ba- mai labele soe arbiru foer iha Estrada públiku; sé mak la kumpre sei selu multa ka koima tuir Dekretu-Lei Nú.3/2024, 18 Janeiru; artigu 12.
- Labele husik animál livre iha estrada públiku; artigu 8, Dekretu Lei Nú.33/2008, 27 Agostu.
- Animál/balada ne’ebe husik livre iha estrada públika husi Tibar to’o Vatuboro-Loes ne’ebé prejudika ambiente no sirkulasaun transporte públika hodi perturba ambiente saudavél tuir Dekretu-Lei no Sirkulár ne’ebé deskreve iha leten tenke kaer no oho” tuir akordu entre Autoridade Munisipál Likisá ho na’in ba animál sira no Estrutura Suku sira maka sai hanesan sasin ba Akordu refere.
- Labele okupa Espasu Públiku tuir lei haruka, se komunidade balun okupa hela Espasu Públiku, husu atu voluntariamente hamamuk ona fatin referidu.
- Bandu labele fa’an sasan ho distancia besik liu dalan públiku ka paseiu.
- Bandu labele taka be’e dalan ka valeta hodi hari’l uma, hela fatin ka fatin hodi fa’an sasan.
- Bandu labele halo konstrusaun iha área protezidu sira no konstrusaun ilegál sira.
Liuhusi Komunikadu ne’e, PAM Likisá hotu hato’o informasaun ba públiku no sosiedade tomak, atu hamutuk proteje ambiente moos, matak, saudável no hakmatek iha territoriu autoridade Munisipál Likisá no ba Timor-Leste tomak.
Jornalista : Hortencio Sanchez
Editór : Cancio Ximenes
