VIKEKE, 07 Marsu 2025 (TATOLI)—Projetu reabilitasaun rezidénsia Prezidente Autoridade Munisípiu (PAM) Vikeke inklui morru no jardín finaliza ona tanba reabilitasaun atinje ona 100%.
“Projetu ba reabilitasaun rezidénsia PAM nian ne’ebé ita implementa iha tinan 2023 nune’e daudaun ne’e finaliza ona servisu fíziku. Durante ne’e ami halo monitorizasaun ba servisu reabilitasaun ne’e ami nota empreza sira serbisu ho di’ak no kualidade di’ak,” Diretór Programa Dezenolvimentu Integradu Munisipál (PDIM) Vikeke, Joaquim Fernandes, hateten ba Agência Tatoli iha ninia kna’ar fatin iha administrasaun munisipál Vikeke, ohin.
Autoridade Vikeke no PDIM planu sei halo inaugurasaun ba rezidénsia referidu iha fulan Marsu ida-ne’e, hodi entrega ba PAM Vikeke utiliza.
“Ami planu ona iha fulan ida-ne’e ita halo inaugurasaun rezidénsia, depois inaugura hotu ita kontinua entrega ba ita-nia PAM hodi uza,” nia dehan.
Enkuantu, projetu reabilitasaun rezidénsia PAM Viqueque ho item tolu mak hanesan morru haleu rezidénsia, reabilita uma no jardin.
Tuir relatóriu husi PDIM munisípiu Viqueque ba tinan 2025, rezidénsia uma, morru no jardín atinje 100% no daudaun tama retensaun 10%.
Reabilitasasun rezidénsia ho morru protesaun ne’e hahú servisu iha loron loron 7 Jullu tinan 2023 ho totál valór osamentu hamutuk $470.225,91, ne’ebé konstrui husi Empreza Peaceful Unipesoál, Lda.
Jornalista : Vitorino Lopes da Costa
Editór : Cancio Ximenes
