VIKEKE, 07 Marsu 2025 (TATOLI)—Servisu Sekretaria Estadu Formasaun Profisionál Empregu (SEFOPE) finaliza ona formasaun lian Inglés ba faze dahuluk ne’ebé oferese ba kandidatu traballadór Austrália na’in-221 iha munisipiu Vikeke.
Diretór Sekretaria Estadu Formasaun Profisionál Empregu (SEFOPE) munisípiu Vikeke, Norberto Pereira Martins, hateten prosesu formasaun ba lian Inglés iha faze dahuluk, SEPOFE Vikeke realiza iha 15 Outubru 2024 durante fulan tolu ne’ebé ramata ona no fó ona teste entrevista ba kandidatu traballadór Austrália sira-ne’e.
“Husi númeru 221 ne’e iha teste entervista ba kandidatu sira-ne’e na’in 210 mak liu no na’in-11 la liu, nune’e sira sei tuir fali formasaun ba faza daruak nian,” Diretór SEFOPE munisipiu Vikeke ne’e hateten ba Agência TATOLI, iha ninia kna’ar fatin administrasaun munisipál Vikeke, ohin.
Ba formasaun lian Inglés ne’e, tuir nia, atu hadi’a kandidatu sira-nia valór husi teste eskrita iha tinan kotuk valór la to’o, ne’ebé sira tuir fila-fali formasaun lian Inglés hodi hadi’a sira-nia valór la sufisiente hanesan poor no very poor sira.
“Tanba ne’e. ba kanditatu sira-ne’ebé liu ona iha formasaun ba faze dahuluk ne’e, karik ba oin mak ajénsia Australia kontaktu ona sira, hafoin ita-nia kandidatu sira-ne’e mai SEFOPE, atu ami bele kompleta sira-nia dokumentu hanesan pasaporte nomós kandidatu sira sei prienxe esperiénsia servisu nian, iha formuláriu ne’ebé ami prepara,” nia dehan.
Tuir dadus, kandidatu traballadór ne’ebé liu teste entervista hamutuk na‘in-210 ne’ebé kompostu husi mane na’in-157 no feto na’in-64.
Aleinde ne’e, Diretór SEFOPE munisípiu Vikeke ne’e informa, daudaun ne’e SEFOPE munisípiu Vikeke hahú halo preparasaun ba formasaun lian Inglés ba traballadór Australia faze daruak nian.
“Agora daudaun ne’e ami hahú halo identifika ba kandidatu ne’ebé valór la to’o hamutuk na’in-310 inklui kandidatu ba faze daruak nian ne’ebé la liu iha entervista. Ami prepara ona atu kontinua implementa formasaun lian Inglés ba faze daruak nian. Ami mós koordena ona ho servisu edukasaun munisípiu Vikeke hodi oferese saladeaula ba ami hodi realiza formasaun. Ne’ebé, saladeaula ne’e ami nafatin uza eskola Ensinu Báziku Sentral (EBC, sigla portugés) nia saladeaula,” nia relata.
Tuir nia, fomasaun ba kandidatu traballadór Austrália ba faze daruak ne’e SEFOPE sei realiza iha fulan-Marsu 2025 ne’e nia laran.
Daudaun ne’e, SEFOPE destaka formadór ba lian Inglés nain-haat (4) ne’ebé kompostu husi koordenadór na’in-ida (2) no formadór na’in-tolu (3) mak hanorin lian Inglés ba kandidatu traballadór sira-ne’e.
Jornalista : Vitorino Lopes da Costa
Editór : Cancio Ximenes
