DILI, 07 Marsu 2025 (TATOLI)—Diretór Empreza Starking, Lay Siu Hing, hateten Starking Medical Center prontu servisu hamutuk ho Governu Timor-Leste atu fasilita tratamentu saúde iha rai-laran.
“Bainhira ospitál ne’e prontu mak Governu hakarak atu servisu hamutuk ho Starking, ami prontu. Nune’e bele fó atendimentu liuliu ba sira-ne’ebé kbiit laiha atu halo tratamentu saúde iha rai-li’ur,” Diretór Empreza Starking, Lay Siu Hing, dehan ba TATOLI, iha nia kna’ar fatin, Audian, Dili, sesta ne’e.
Nia hateten, konstrusaun Medical Center ne’ebé harii husi Empreza Starking ne’e lokaliza iha Audian no agora atinje ona 98%, hela de’it lift (elevadór) mak seidauk, iha-ne’ebé gasta orsamentu hamutuk millaun $15.
“Ita-nia ospitál ne’e foka ba iha tratamentu espesializadu sira hanesan fuan, neorolojia, kankru no mós kemoterapia sira,” Lay Siu esplika.
Nia haktuir katak ospitál refere iha kuartu hamutuk 48, sala VIP lima, VVIP ida no kuartu jerál nian ne’e kama hamutuk 87,” nia tenik.
Nia subliña, médiku espesialista sira-ne’ebé mak atu atende pasiente sira iha ospitál referidu, balun sei mai husi rai-li’ur hanesan Kuba, Indonézia, Malázia inklui espesialista timoroan sira.
“Ekipamentu ne’ebé sei utiliza iha ospitál ida-ne’e mak hanesan Magnetic Resonance Imaging (MRI), CT-Scan, Catlap, X-ray. Ospitál atu ativu iha fulan-Abríl iha tinan ne’e nia laran, maibé mákina hanesan MRI seidauk to’o mai, entaun muda fali bá Maiu ka Juñu mak foin ativu,” nia konklui.
Jornalista: Felicidade Ximenes
Editór: Xisto Freitas da Piedade
