VIKEKE, 08 Marsu 2025 (TATOLI)- Juventude Movimentu Hadia Ambiente, Denvolve Agrikultura no Ekonomia Komunidade (HADAEK), sábadu ne’e, lansa programa to’os eskolár hodi apoia ba Ensinu Báziku Filiál Falur Rate Laek iha suku Loihunu, postu Ossú, munisípiu Vikeke.
“Programa ida-ne’e inisiativa mai husi ita-nia joven Vikeke-oan sira ne’ebé involve iha movimentu HADAEK, hodi implementa to’os eskolár. Tanba programa ne’e sei ajuda tebes eskola hodi kontribui ba programa merenda eskolár”, Reprezentante Diretór servisu Edukasaun munisípiu Vikeke, Emidio Amaral, hateten iha serimónia lansamentu programa To’os Eskolár, iha EBF Falur Rate Laek, Loihunu, ohin.
Ho inisiativa ne’e, Emidio agradese ba movimentu HADAEK tanba foin moris maibé iha inisiativa di’ak hodi implementa programa referida hodi apoia edukasaun Vikeke.
“Ha’u fi’ar katak joven sira bele halo atividade sira-ne’e. Nune’e, ha’u husu movimentu ida-ne’e tenke hatutan programa ne’e ba eskola EBF no Ensinu Báziku Sentral (EBC, sigla portugés) sira seluk tanba sira ne’e implementa programa merenda eskolár, liuhusi toos eskolár ne’e ha’u fiar bele kontribui ba implementasaun programa merenda eskolár ho di’ak”, nia hato’o.
Iha fatin hanesan, Koordenadór Movimentu HADAET, Feliz da Cruz, haktuir implementasaun programa ne’e ho inisiativa rasik ho objetivu atu apoiu Programa Ministériu Edukasaun (ME) kona-ba to’os Eskolár hodi
kontribui ba Programa Merenda Eskolár.
Aleinde ne’e, atu enkoraja individu ka inan-aman sira hodi prátika iha uma, nune’e bele prodús ai-han nutritivu ba família uma-laran no mós hadi’a ekonómia família.
“Tanba ne’e, ami ohin lansa programa ne’e iha eskola EBF Falur Rate Laek. Liuhusi programa ne’e ita bele prodús modo hodi apoia ba implementasaun programa merenda eskolár”, nia subliña.
Atividade ne’e implementa durante fulan neen liuliu apoia fini hanesan modo, kangkung, baria no seluk tan no oferese formasaun.
Programa to’os eskolár ne’e sei benifisia ba estudante EBF Falur Rate-La’ek husi estudante siklu 1, 2 no 3, hamutuk 242 kompostu husi feto na’in-125 no Mane na’in-117, totál profesór na’in-12, mane na’in-neen no feto na’in-neen.
Iha lansamentu programa toos eskolár ne’e movimentu HADAET mós kuda ai-oan hanesan saburaka no Kakau hamutuk 16 kuda iha área eskola EBF Falur Rate La’ek.
Iha serimónia ne’e hetan partisipa husi autoridade lokál, komadante eskuadra PNTL Ossú, profesór no estudante EFB Falur Rate Lae.
Jornalista: Vitorino Lopes da Costa
Editór : Florencio Miranda Ximenes
