DILI, 10 Marsu 2025 (TATOLI)—Diretór Nasionál Farmásia Produtu Médiku (DNFPM), Delfim da Costa Xavier Ferreira, hateten tinan ne’e Diresaun Nasionál Farmásia Produtu Médiku DNFPM kontinua prepara item ai-moruk atu bá teste kualidade iha Laboratóriu Therapeutic Goods Administration Australia.
“Ita-nia programa ida teste ai-moruk nia kualidade ne’e la’o bazeia ba servisu hamutuk ho laboratóriu Austrália. Entaun, iha loron 25 Marsu tinan ne’e, ita sei ramata ita-nia akordu ho Austrália. Tan ne’e, iha semana kotuk, ami halo ona koordenasaun iha zoom call ho parte Austrália atu haree se ita iha proposta ruma ita hato’o, tanba sira fó oportunidade ba ita atu haruka ita-nia amostra bá halo teste kualidade iha-ne’ebá,” Delfim Ferreira dehan ba TATOLI iha nia kna’ar fatin, segunda ne’e.
Nia afirma, ekipa sira sei haree hela kestaun téknika liuliu liña koordenasaun sira. Banhira buat hotu loos ona mak serimónia asina akordu tékniku ne’e realiza ba tinan haat tuirmai.
“Item ne’ebé mak atu haruka bá ne’e sira admite nafatin neen iha kada semestre. Ida-ne’e mak ajuda ita bele hetan apoiu, tanba amostra nafatin foti iha Governu nian no klínika privada sira-ne’ebé mak ita identifika iha prioridade atu halo teste,” nia haktuir.
Antes ne’e, Delfim Ferreira, haktuir durante tinan 2024, Diresaun Nasionál Farmásia Produtu Médiku (DNFPM), haruka ai-moruk item 12 bá teste kualidade iha Laboratóriu Therapeutic Goods Administration iha Austrália.
Notísia relevante: DNFPM haruka ai-moruk item 12 ba laboratóriu Austrália
“Durante tinan 2024, ita haruka ai-moruk item 12 bá teste kualidade iha laboratóriu Therapeutic Goods Administration iha Austrália. Husi ne’e faze dahuluk ita haruka neen, depois faze daruak ita haruka tan neen,” Diretór DNFPM, Delfim da Costa Xavier Ferreira, informa ba TATOLI iha nia kna’ar fatin, foin lalais ne’e.
Nia afirma, husi item 12 ne’e iha item rua mak rezultadu sai ona ne’ebé hatudu kualidade no sira seluk iha prosesu teste, tanba la’ós Timor-Leste de’it mak lori item bá, maibé nasaun pasífika sira mós teste hotu iha ne’ebá.
“Item rua mak rezultadu di’ak ne’ebé mak mai ona katak laiha kontaminasaun. Ne’e mak item hanesan Paracetamol Syrup 120mg/5ml no Naf Nystatin Suspension BP 100,000 units/ml. Enkuantu, sira seluk iha prosesu teste atu haruka mai, nune’e ita kompleta hotu lista 2024 nian mak hafoin ita prepara tan lista ba 2025 nian,” nia haktuir.
Delfim esplika, iha fulan-abríl no maiu 2025 mak DNFPM sei haruka tan item neen ba laboratóriu Austrália atu teste tan ai-moruk nia kualidade.
“Item 12 ne’e ita foti husi Institutu Nasionál Farmásia Produtu Medikamentu (INFPM), no mós ita foti iha importadór privadu sira ne’ebé mak iha-ne’e,” nia subliña.
Entretantu, item ai-moruk ne’ebé mak durante 2024 teste iha laboratóriu Austrália mak Naf Nystatin Suspension 12ml, Suspension BP, Lepril-5 Enalapril Maleate Tablets IP, Fladex Metronidazole Influs 100 ml, Doxycycline Capsules BP 100 mg, Paracetamol Syrup 120 mg/5 ml, Paracetamol Kaplet 500 mg no seluk tan.
Rekorda katak tuir Sínteze Loron 120 Kompromisu nian iha pontu 15 hateten, IX Governu Konstitusionál sei sosa, prodús no asegura kontrolu ba kualidade produtu farmaséutiku no ekipamentu médiku sira. Governu prosede mós levantamentu ba nesesidade kona-ba medikamentu no produtu médiku no farmaséutiku sira seluk ne’ebé falta iha ospitál, sentru saúde no laboratóriu sira, no selebra kontratu ida hodi fornese ai-moruk sira hotu ne’ebé falta ho urjénsia. Kontratu ne’e ho valór dolar amerikanu millaun $5,9.
Jornalista: Felicidade Ximenes
Jornalista: Felicidade Ximenes
