DILI, 10 Marsu 2025 (TATOLI)— Ensinu Sekundáriu Jerál (ESJ) sira iha territóriu hahú fahe diploma eskolár ba estudante finalista tinan 2024.
“Diploma ne’e iha ami fulan ida ona, no eskola ida-ne’e mak iha podér tomak hodi asina diploma finalista 2024 nian no Edukasaun munisípiu só legaliza de’it. Agradese tanba Ministériu Edukasaun tanba bele halo mudansa hodi hafasil prosesu ne’e”, Diretór Eskola Sekundáriu Jerál FINANTIL, Aniceto Barlelo, ba TATOLI, iha nia knaar fatin Aimutin, segunda ne’e.
Nia dehan, estudante finalista kuandu ezame hotu lakohi mai hakbesik hodi buka hatene informasaun kona-ba atu foti diploma hodi kontinua ba universidade.
Nune’e halo kópia no entrega ba Edukasaun Munisipál legaliza foin bele ba rejistu iha universidade.
“Ita-nia estudante kuandu mai foti diploma ne’e tenke lori ho sertidaun batizmu hodi bele prense diploma tanba prense ne’e rigorozu tebes hosi 5%. Ami-nia estudante finalista 2024 ne’e hamutuk 569. Signifika diploma ne’ebé Ministériu Edukasaun distribui mai ami ne’e labele liu tahan 10. Kuandu prense tenke kuidadu tebes no uza kaneta ho tinta boot ne’ebé ema labele hamoos iha diploma “, nia dehan.
Entertantu Diretór Eskola Ensinu Sekundáriu Jerál 4 Setembru Balide Dili, Sérgio Alfredo da Cruz, informa, diploma finalista nian ne’ebé Ministériu Edukasaun atribui ne’e prense ona no hein estudante finalista foti de’it.
“Ami-nia estudante finalista 2024 hamutuk 900-resin, ne’ebé balun mai foti ona ninia diploma hodi ba rejistu iha universidade”, Diretór dehan.
Entertantu Diretór Interinu Eskola Ensinu Sekundáriu Jerál Nicolau Lobato, Rui Lopes, hatete, diploma ba estudante finalista 2024, Diretór sesante asina hotu depois remata asina sei lori ba Servisu Edukasaun Munisípiu Dili, legaliza mak foin bele fahe ba estudante sira.
Koordenadór Gabinete Unidade Kurríkulu, João Maupelo, hatete totál diploma neʼebé Ministériu Edukasaun fahe ba eskola sira hamutuk rihun 55-resin.
“Ita-nia diploma ba alunu sira; Ensinu Báziku purvolta rihun-28, Ensinu Sekundáriu Jerál rihun-23 no Ensinu Tékniku Vokasionál hamutuk rihun-haat-resin”, nia relata
“Ha’u atu esplika klaru liután katak diploma tinan ne’e la hanesan tinan-tinan, tinan ne’e fahe ba eskola mak prense alunu nia biografia, valór no diretór eskola mak asina, la’ós ona Diretór Servisu Edukasaun Munisipál. Uluk Diretór Servisu Edukasaun Munisipál maibé Diretór eskola sira-neʼebé mak hetan nomeasaun hodi Komisaun Funsaun Públika mak sei asina diploma”.
Jornalista: Osória Marques
Editór: Evaristo Soares Martins
