DILI, 11 Marsu 2025 (TATOLI) – Polísia Filipina detein, iha tersa-feira ne’e, eis-Prezidente Rodrigo Duterte, hafoin nia to’o iha Manila, bazeia ba orden husi Tribunál Penál Internasionál (ICC, sigla inglés).
Tuir deklarasaun husi Eskritóriu Komunikasaun Prezidensiál Filipina (PCO, sigla inglés), mandadu detensaun ne’e Organizasaun Internasionál Polísia Kriminál (INTERPOL) simu husi ICC iha tersa-feira dadeer ne’e.
Tuir notísia ne’ebé TATOLI sita husi Antara, Duterte to’o iha Filipina iha tuku 9:20 oras lokál, uza vou CX 907 Cathay Pacific husi Hong Kong.
Bainhira to’o iha aeroportu, tuir PCO, Prokuradór Jerál entrega notifikasaun ofisiál husi ICC ne’ebé konfirma mandadu detensaun ba antigu Prezidente Filipina ne’e.
Konforme ICC, Duterte hetan akuzasaun ho krime kontra umanidade durante sangrenta kampaña kontra droga.
PCO garante ba populasaun katak eis-prezidente ho idade 79 ne’e iha kondisaun di’ak no diretamente hala’o ezame médika.
“Antigu Prezidente [Duterte] hamutuk ho nia ekipa iha kondisaun estavel no hala’o hela ezame médika husi doutór atu garante nia kondisaun”, PCO hateten.
Polísia Filipina ne’ebé hala’o mandatu detensaun ne’e mós kompleta ho kámara korpu (isin) atu asegura trasparénsia durante operasaun detensaun ne’e la’o.
Antes ne’e, Governu Filipina hateten katak nia parte sei la koopera ho investigasaun ICC iha kazu ne’ebé envolve Duterte. Maibé, Ezekutivu Filipina subliña katak nia parte iha obrigasaun atu hala’o asaun tuir konformidade INTERPOL.
TATOLI
