Governu konsidera konsultasaun sidadania importante ba autoridade lokál
VIKEKE, 11 Marsu 2025 (TATOLI)—Governu liuhusi Vise-Ministru Administrasaun Estatál (MAE), Jacinto Rigoberto de Deda Crusus, konsidera konsultasaun sidadania Planu Asaun Anuál (PAA) 2026 ne’e importante atu autoridade lokál sira iha munisípiu Vikeke hodi identifika no aprezenta ba planu prioridade tinan 2026.
“Tanba ne’e, ohin, ami hahú halo konsultasaun sidadania iha parte Leste iha Vikeke. Konsultasaun sidadania ne’e importante tebes, ba ita-nia planu, no identifika planu prioridade sira, tau planu tinan 2026 nian,” Jacinto Rigoberto de Deus, hateten iha abertura konsulta sidadania iha salaun administrasaun Vikeke, ohin.
Governante ne’e dehan, MAE no Ministériu Finansa (MF) hakarak tau inportánsia ba konsultasaun sidadania ne’e fó inportánsia no perioridade atu Governu no autoridade sira hakaas-aan identifika prioridade sira iha baze tau ba planu hodi implementa iha tinan oin.
“Planu Estratéjiku Dezenvolvimentu Nasionál (PEND) 2011-2030 ne’ebé ita hotu hatene ona, hatuur iha enkuadramentu PEND no podér lokál. Nune’e ba konsultasaun ida-ne’e kada liña setorál sira kada suku ida-idak aprezenta sira-nia planu prioridade sira iha suku, hodi bele prodús planu ida, lori MAE no MF hodi lori ba Konsellu Ministru,” nia hateten.
Prezidente Autoridade Munisípiu (PAM) Vikeke, Francisco Cruz Simões de Gonzaga Soares, husu agradese ba prezensa Governu liuhusi Vise MAE ho ninia ekipa mai minisípiu Vikeke hodi realiza konsultasaun sidadania.
“Ha’u hato’o agrradesimentu ba vise MAE ho ninia ekipa sira-ne’ebé mai realiza konsultasaun sidadania ba autoridade lokál, diretór territoriál, munispál, ita prontu hodi rona mensajen husi na’i-ulun sira liuliu ba planu prioridade sira,” nia dehan.
Xefe suku Uaibobo, postu Ossú, munisípiu Vikeke, Goularte Melo Guterres, relata iha konsultasaun sidadania ne’e prefere hadi’a dalan, kanaliza bee-moos ba komunidade no hadi’a postu saúde sira atu komunidade hela iha área rurál asesu.
“Ba konsultasaun sidadania ne’e, ha’u hakarak aprezenta planu importante ba ha’u-nia povu iha Uaibobo ne’ebé hela iha área rurál liuliu estrada, bee-moos no saúde tanba ne’e sai importante ba ha’u-nia povu. Ha’u espera tinan oin (2026) Governu no autoridade munisípiu bele rezolve,” nia dehan.
Partisipa iha konsultasaun sidadania ne’e, reprezentante MF, reprezentante Ministériu Edukasaun, reprezentante Ministériu Obra Públiku (MOP), xefe suku, administradór postu administradór lima, diretór territoriál, diretór munisipál.
Jornalista : Vitorino Lopes da Costa
Editór : Cancio Ximenes
