DILI, 11 Marsu 2025 (TATOLI) – Kondisaun saúde Papa Francisco hahú di’ak no estavel hafoin semana tolu internadu iha Ospitál Gemelli, informa Vatikanu.
“Kondisaun klínika Santu Padre kontinua estavel. Mellora rejistada iha loron hirak ikus ne’e konsolida liután, hanesan konfirma husi rezultadu ezame raan, objetividade klínika nomós resposta pozitivu [Papa] ba terapia farmakolójika”, haktuir husi Vatikanu.
Haree ba dezenvolvimentu saúde Papa nian ne’e, ekipa médika deside atu “retira prognóstiku rezervadu”. Maibé, haree ba kompleksidade kuadru klíniku Papa nian maka nesesáriu atu kontinua halo tratamentu médiku iha loron balun tan.
Iha loron 10 Marsu, iha sesaun dadeer no loraik, Papa Francisco partisipa iha retiru espirituál liuhusi videokonferénsia.
Aleinde tuir retiru, Papa mós nafatin hala’o terapia fízika no respiratória iha sala ne’ebé nia internadu ba.
Líder igreja katólika ho idade 88 ne’e tama iha ospitál dezde loron 14 Fevereiru, tanba sofre pneumonia bilaterál.
TATOLI
