DILI, 11 Marsu 2025 (TATOLI)- Ministériu Administrasaun Estatál (MAE) liuhusi Sekretáriu Munisipál Planeamentu Investimentu no Dezenvolvimentu Integradu, Francisco dos Santos garante, MAE sei esforsu atu haluan liután servisu atendimentu públiku nian iha baze sira, nune’e bele fasilita populasaun sira hodi trata dokumentu.
Atendimentu públiku ne’e liuhusi implementasaun husi Governasaun Urbana nian, ne’ebé harii ona fatin foun ida tan ho naran Balkaun Úniku hodi halo atendimentu públiku, nune’e MAE iha inisiativa atu planu hodi halo luan liutan servisu atendimentu administrasaun públiku iha munisipál sira.
“Fatin estabelesimentu ida-ne’e la’ós iha Dili de’it, maibé iha munisípiu hotuhotu, para aselera ita-nia governasaun ba iha baze”, Francisco dos Santos hatete ba jornalista TATOLI, hafoin ensera atividade termu entrega fasilidades Balcao Único ba Autoridade Munisipál Díli (AMD) husi Governasaun Urbana ne’ebé implementa husi União das Cidades Capitais de Língua Portuguesa (UCCLA, sigla portugés) no Câmara Municipal Lisboa, iha Autoridade Munisipál, Dili.
Daudaun ne’e iha diresaun servisu munisipál hamutuk sanulu resin-sia, no MAE sei esforsu atu aumenta tan nune’e bele asegura nesesidade ne’ebé munisípiu sira presiza.
“Liliu ba atendimentu públiku sira, husi Ministeria Estatál sei esforsu aan atubele akumula diresaun sira no agora daudaun servisu munisipál iha sanulu resin-sia, maibé, sei esforsu tan para aumenta iha nesesidade ne’ebé maka sei presiza iha munisípiu”, nia haktuir.
Tanba ne’e, Sekretáriu ne’e agradese ba Governasaun Urbana nian, ne’ebé bele ajuda ona apoia fasilidade ba servisu atendimentu públiku nian iha kapitál Dili, hodi bele aselera espasu servisu ne’e ba satisfasaun populasaun nian no espera katak MAE mós sei nafatin esforsu atu aumenta tan balkaun servisu iha nivél munisipál.
Notísia relevante:Governasaun Urbana entrega fasilidade atendimentu púbiku foun ba AMD
Jornalista: Alexandra da Costa
Editór: Rafael Ximenes de A. Belo
