KOVALIMA, 11 Marsu 2025 (TATOLI) – Ministériu Administrativu Estatál (MAE), liuhusi Sekretáriu Estadu dezenvolvimentu lokál, hala’o konsultasaun sidadania kona-ba Planu Asaun Anuál (PAA) 2026, ho Autoridade sira iha munisípiu Kovalima.
Sekretáriu Estadu dezenvolvimentu lokál Mateus W. dos Santos Tallo haktuir, iha tinan hirak liubá diretór jerál sira mak mai maibé iha tinan ne’e diferente ho koordenasaun husi Ministériu finansa no Ministériu administrasaun estatál hodi halo konsultasaun sidadania iha munisípiu Kovalima.
“MAE delega ha’u mai iha ne’e, ha’u atu hateten ba parseiru dezenvolvimentu nasionál no internasionál, importante Ministériu ne’ebé estratéjiku atu mai fó asisténsia planeamentu no orsamentu ba ita-nia servisu munisípiu sira. Ita hotu hatene dekretu-lei númeru 84 delega kompeténsia mai munisípiu ne’ebé ho limitasaun orsamentu”, Governante ne’e hato’o iha nia diskursu bainhira abertura konsultasaun sidadania iha salaun AMC, ohin.
Ho nune’e Governante ne’e dehan, presiza atu serbisu maka’as tulun husi Governu sentrál bele elobora planeamentu no orsamentu bele responde nesesidade povu nian liliu programa boot ba dezentralizasaun no podér lokál.
“Prinsípiu fundamentál husi konsulta sidadania ida-ne’e mak ita-nia povu nia lian, tenke orienta ba dirasaun dezenvolvimentu ita-nia nasaun nian ida-ne’e mak prinsípiu ne’ebé ita kaer ho entidade lubuk ida, ita sei hahú diskusaun tékniku ho xefe suku, veteranu, administradór postu oinsá ita atu haree elabora ita-nia planeamentu ne’ebé responde ba nesesidade povu”, nia informa.
Atividade konsultasaun sidadania ne’e atu haforsa partisipasaun sidadaun, fornese plataforma, ho kanál asesivel ba imput sira hodi haforsa sidadaun sira-nia envolvimentu no reforsa komunidade sira atu partisipa ativamente iha prosesu planeamentu orsamentál ba tinan-2026.
Iha konsultasaun sidadania ne’e atu hala’o preparasaun planu no organiza prosesu konsultasaun, envolvimentu-trajetu ba reprezentante sira komunidade ka sidadaun sira no parte interrasada sira hanesan reprezentante ema ho defisiénsia, halibur hanoin sira liuhusi métodu oioin (survey & grupu diskusaun)
Aleinde ne’e halo análiza dadus ne’ebé halibur ona hodi identifika komunidade nia prioridade xave sira, integrasaun-Integra hanoin sira iha prosesu planeamentu orsamentu “PAA 2026” no Jornada Orsamentál-Komunika rezultadu “relatóriu no komunika ho Liña Ministériu” decision makers” liuhusi Jornada Orsamentál.
MAE hala’o konsultasaun bazeia ba baze legál Lei Nú 2/2022, 10 Feveriru, kona-ba enkuadramentu Orsamentu Jerál Estadu no Jestaun Finanseira Públika (LEO), artigu 45.o. Iha alinea 2 kona-ba Prosesu Planeamentu Orsamentál inklui konsultasaun ho Sidadaun sira, Órgaun Soberanu sira, Servisu no entidade sira iha setór Administrasaun Públika nian.
Iha atividade konsultasaun ne’e partisipa husi reprezentante Ministériu Finansa no liña ministeriál sira mak hanesan ,Ministériu Administrasaun Estatal,Ministériu Saúde, reprezenta Ministériu Edukasaun,r eprezenta Ministériu Agrikultura Pekuária, Peska no Floresta no reprezenta Diretór Jeral Ministériu Obra públika reprezenta Prezidente BTL Turizmu no Ambiente
Prezidente Autoridade Munisípiu Kovalima, Miguel Armada Cardoso, atividade konsultasaun ne’e presiza rona opiniaun husi líder lokál no entidade sira atu elobora PAA 2026 ho di’ak liu.
“Atu rona ita boot sira nia hanoin liliu lidér komunitária sira parseiru no joven sira no veteranu sira hodi fó ideia oinsa prosesu tomak PAA 2026 atu elobora rona husi ita boot sira”, nia fó hanoin.
Jornalista:Celestina Teles
Editór: Rafael Ximenes de A. Belo
