DILI, 10 Marsu 2025 (TATOLI)—Diretór Ezekutivu Hospital Nacional Guido Valadares (HNGV), Nuno Vital Soares, hateten hanesan ezekutivu nafatin reforsa servisu sira-ne’ebé antes la’o ona iha HNGV nune’e atendimentu bele la’o ho di’ak.
“Ha’u mai reforsa no atu kontinua buat ne’ebé mak eziste ona. Karik buat balun seidauk di’ak, depois sei hadi’a,” Diretór Ezekutivu HNGV dehan ba jornalista sira iha HNGV, Bidau, tersa ne’e, hafoin simu pose nu’udár Diretór Ezekutivu Hospital Nasional Guido Valadares ba períodu 2025-2028, hodi substitui diretora sesante Cecília Barros Mendonça.
Nuno informa katak, kona-ba servisu HNGV, nia sei la fó komentáriu barak tanba foin mak komesa servisu.
Antes asumi kna’ar atuál, Nuno asumi kna’ar hanesan Prezidente Junta Médiku HNGV no hanesan mós Diretór Ezekutivu Laboratóriu Nasionál.
Entretantu, Vise Ministru Fortalesimentu Institusionál Saúde, José dos Reis Amaral hato’o ba emposadu sira katak tenke halo servisu maka’as tuir kompeténsia ne’ebé atribuidu ona.
“Ha’u husu ba ita-boot sira atu servisu di’ak hodi serbí instituisaun sira no mós servisu sentrál,” nia hameno liuhusi nia deskursu.
Aleinde ne’e, Komisáriu Asuntu Disiplinár husi Komisaun Funsaun Públika (KFP), Agapito da Conceição, hato’o ba emposadu sira atu halo servisu ho profisionál hodi atende povu.
“Ita bele dehan katak iha mídia sosiál sempre kestiona kona-ba Ministériu Saúde nia servisu, liuliu ba ospitál sira no ospitál referrál sira iha territóriu laran tomak, tan ne’e presiza fó laran ida-ne’ebé mak ho ita-nia kapasidade, ita-nia matenek atubele halo atendimentu ba públiku ho dignu,” nia informa.
Emposadu hirak ne’ebé simu pose mak hanesan Diretór Nasionál Farmásia Produtu no Médiku (INFPM), Diretór Ezekutivu Hospital Nacional Guido Valadares (HNGV), Diretór Nasionál Saúde Promosaun no Edukasaun iha Ministériu Saúde inklui kargu xefia sira.
Jornalista: Felicidade Ximenes
Editór: Xisto Freitas da Piedade
