BAUKAU, 10 Marsu 2025 (TATOLI)—Parseiru dezenvolvimentu liuhosi Programa Nasaun Unida ba Dezenvolvimentu (PNUD) sei apoia orsamentu hodi reabilita estrada rurál iha suku Ossoala, postu administrativu Vemasse, munisípiu Baukau.
Diretór Serbisu Munisipál Obra Públika (SMOP) Baukau, Agostinho Ximenes, esplika estrada diresaun referida antes ne’e reabilitadu ona maibé sei presiza kontinua kompleta to’o suku Ossoala.
“Ita tinan ne’e laiha fundu entaun husu apoia ba parseiru dezenvolvimentu hanesan PNUD. Dokumentu tékniku sira kompleta ona maibé seidauk serteja bainhira mak hahú,” Diretór Serbisu Munisipál Obra Públika Baukau informa ba TATOLI iha ninia kna’ar fatin, Vila Nova, Baukau, segunda ne’e.
Agostinho Ximenes salienta katak Obra Públika Baukau tinan ne’e laiha orsamentu hodi implementa programa reabilitasaun inklui manutensaun ba estrada rurál iha munisípiu Baukau.
Tuir planu, estrada diresaun referida sei loke konkursu liuhosi Autoridade Administrasaun Munisipál ne’ebé kontinua reabilita hahú hosi start point ho totál distánsia kilómetru 3.5.
“Bainhira ida-ne’e finalizadu bele ona rezolve preokupasaun komunidade nian relasiona ho kondisaun estrada iha-ne’ebá,” nia tenik.
Estrada rurál iha suku Ossoala antes ne’e reabilitadu ona ho kilómetru haat tanba konsideradu grave ne’ebé responsabiliza husi Kompañia Rozi Unipessoal, Lda iha tinan-2022 no hela kilómetru 3.5.
Entretantu, totál estrada rurál iha munisípiu Baukau hamutuk kilómetru 472 kompostu kilómetru 212-resin mak reabilitadu ona no kilómetru 260 seidauk.
Jornalista: Natalino Belo
Editór: Xisto Freitas da Piedade
