Francisco Fernandes eleitu sai prezidente UAV períodu 2025-230
VIKEKE, 12 Marsu 2025 (TATOLI)-Kanditatu Francisco Fernandes eletu dauluk sai prezidente Uniaun Agrikultura (UAV) munisípiu Vikeke hodi lidera ba mandatu 2025-2030, hafoin liuhusi kongresu dahuluk organizasaun Uniaun Agrikultura munisípiu Vikeke ne’ebé liu husi eleisaun.
Notísia Relevante:
“Ba komfiansa ne’ebé fó mai ha’u hodi lidera Uniaun Agrikultura munisípiu Vikeke, atu lori grupu agrikultór sira. Tanba Vikeke ne’e rai bokur no poténsia tebes ba setór agrikultura sira. Nune’e, ita presiza organiza malu hodi foku ba setór agrikultura,” Francisco Fernandes hateten iha nia intervensaun iha kongresu Uniaun Agrikultura Vikeke iha sede suku Uma Kiik, ohin.
Tanba ne’e, nia husu Grupu Agrikultór sira-ne’ebé envolve iha Uniaun Agrikultura munisípiu Vikeke haki’ak mós animál hanesan fahi, manu-rade no manu sira hodi fornese ba merkadu.
“Atu ita labele komsumu hela de’it ayam potong, tanba agora ne’e ita konsumu maioria mak ayam potong. Tanba ne’e, ha’u hakarak husu ba membru Uniaun Agrikultura sira, ita hamutuk hodi redús ayann potong mai munisípiu Vikeke,” nia dehan.
Nune’e, nia dezafia grupu sira badinas prodús produtu lokál no kada grupu ida tenke iha rasik produtu úniku ida, atu ema hotu bele sente.
“Ba oin. ami sei halo mapeamentu ba grupu 35 ne’ebé hamahon aan iha Uniaun Agrikultura Vikeke, hodi idetifika grupu sira-nian produtu, atu mosu feira ruma karik, grupu sira bele lori sira-nia produtu ba partisipa. Estrutura sei servisu hamutuk ho grupu sira hodi lori Uniaun Agrikultura ba oin,” nia dehan.
Iha biban ne’e, Xefe Grupu Uetasi, Celestino Rangel Pinto, haktuir sei servisu hamutuk ho estrutura no membru Uniaun Agrikultura sira hodi lori Uniaun ne’e ba oin.
“Ha’u sei servisu hamutuk ho membru Uniaun sira, atu lori Uniaun ba oin. Tanba eleitu mós iha estrutura Uniaun, krik buat ruma la loos membru sira tenke fó korresaun ka hodi’a no haburas Uniaun Agrikultura munisípiu Vikeke,” nia hateten.
Estrutura Uniaun Agrikultura munisípiu Vikeke kompostu husi prezidente Uniau Agrikultura munisípiu Vikeke, Francisco Fernandes, vise prezidente Celestino Rangel Pinto no sekretária Uniaun Agrikultura, Carlota Rangel.
Partisipa iha eleisaun kongresu Uniaun Agrikultura munisípiu Vikeke hamutuk grupu 35 ho totál membru partisipa votasaun hamutuk na’in-85. Kongresu Uniaun Agrikultura munisípiu Vikeke durante loron tolu hahú segunda no ramata kuarte ne’e, ne’ebé la’o ho di’ak.
Jornalista : Vitorino Lopes da Costa
Editór : Cancio Ximenes
