DILI, 12 Marsu 2025 (TATOLI)—Diretór Servisu Apoiu Diagnóstiku no Terapeútiku Hospital Nacional Guido Valadares (HNGV), Vidal de Jesus Lopes, klarifika katak pesoál saúde sira ne’ebé la simu direitu over time husi Juñu to’o Dezembru 2024 ne’e laloos.
“It-nia pesoál saúde iha Departamentu Emerjénsia ne’ebé dehan la simu direitu ba over time husi Juñu to’o Dezembru ne’e laloos, tanba ita konfirma ho parte rekursu umanu no finansa HNGV katak fulan rua de’it mak seidauk simu, husi Novembru to’o Dezembru tinan kotuk nian,” Vidal de Jesus Lopes ba jornalista sira iha Hotel Timor, Dili, kuarta ne’e.
Nia hateten, maski Governu selu tarde, maibé sei selu, tanba ne’e agora sei iha prosesu laran.
“Direitu ne’ebé sira simu ne’e over time ho turnu, más saláriu vensimentu la’o nafatin hanesan babain. Tanba ne’e, informasaun ne’ebé deklara iha Parlamentu Nasionál (PN) ne’e laloos. Ha’u ko’alia selu tarde mós sei selu, tanba prosesu la’o hela,” nia haktuir.
Iha semana kotuk, reprezentante povu iha Parlamentu Nasionál husi bankada Partidu Libertasaun Populár (PLP), deputada Maria Angelina Sarmento, kestiona maka’as kona-ba pesoál saúde sira iha Departamentu Emerjénsia HNGV seidauk simu osan turnu ka over time tinan 2024 to’o 2025.
Jornalista: Felicidade Ximenes
Editór: Xisto Freitas da Piedade
