DILI, 12 Marsu 2025 (TATOLI)—Diretór Servisu Selesaun Nasionál Federasaun Futeból Timor-Leste (FFTL), João Maneco Soares Amaral, hateten jogadór timoroan na’in-rua husi Austrália, daudaun ne’e sei kompleta dokumentu hanesan pasaporte, billete identidade no sertidaun RDTL, antes reforsa ekipa selesaun nasionál.
“Jogadór na’in-rua ne’e timoroan duni, sira na’in-rua maun-alin rasik. Durante ne’e sira hela iha Austrália. Sira-nia inan Timor, Ermera kahur ho Baucau, sira-nia aman mak australianu,” Diretór ne’e hateten ba Agência TATOLI, iha edifisiu FFTL, Dili, kuarta ne’e.
Jogadór na’in-rua sei iha problema uitoan kona-ba tratamentu dokumentu, hanesan sertidaun RDTL finaliza ona maibé billete identidade mak sei problema hela tanba sistema seidauk di’ak.
“Bainhira sira-nia dokumentu finaliza ona mak sira bele tuir ita-nia jogadór selesaun nasionál sira iha rai-li’ur hela. Maibé, ba jogu amigavel ne’ebé ita atu hasoru Lebanon iha Doha loron 20 fulan-Marsu agora no jogu kualifikasaun AFC Cup ne’ebé ita kontra Tazakistan iha loron 25 marsu ne’e, sira na’in-rua seidauk bele joga. Ita prepara sira ba jogu seluk tuir mai,” nia dehan.
Antes ne’e, iha segunda (10 Marsu 2025), jogadór timoroan na’in-rua husi Austrália (diáspora) aprezenta aan ba Federasaun Futeból Timor-Leste (FFTL) no hakarak atu reforsa ekipa selesaun nasionál Timor-Leste.
Jogadór na’in-rua ne’e maun-alin, Jackson Pereira (Maun) ho idade-20 ho Nicholas Pereira (Alin) ho idade-17, oan husi aman Matt Fowler (Australiano) no mós inan ne’ebé ema puru Timor naran Sonia de Jesus Pereirra, sira na’in-rua daudaun joga hela iha klube Sydney Olympic FC-National Premier League (NPL), State One.
Jogadór na’in-rua 92) ne’e, ho ida-idak nia pozisaun mak hanesan, Jackson Pereira joga ho pozisaun Defeza Central (Defender-Center Back), Nicholas Pereira joga ho pozisaun Midfielder.
Jogadór na’in-rua (2) mai aprezenta aan ba FFTL ne’e, akompaña husi Inan ho Aman no simu direta husi Diretór Servisu Selesaun Nasional FFTL João Maneco Soares Amaral ho Diretor Tékniku FFTL Quintāo Gaspar.
Jornalista : Hortencio Sanchez
Editór : Cancio Ximenes
