DILI, 11 Marsu 2025 (TATOLI) – Ligadu ho kazu asédiu seksuál ne’ebé akontese iha Ensinu Sekundáriu Jerál 5 de Maio no Ensinu Sekundáriu Jerál Nicolau Lobato Komoro, Komisaun Funsaun Públika (KFP) halo ona suspensaun ba infratór na’in-rua no prosesu investigasaun kontinua la’o hela.
Komisária Komisaun Funsaun Públika, Anita Tavares Oliveira de Jesus, hatete, kazu asédiu seksuál ne’e ne’e ekipa atende ho seriedade tanba viola ona ema-nia direitu.
“Iha semana kotuk komisaun hasai ona ka suspende Diretór na’in-rua ne’e, Prosesu suspensaun sei la’o hela no ita-nia ekipa ne’ebé haree ba asuntu ne’e sei foti dadus no halo investigasaun kontinuasaun tanba ne’e hein de’it prosesu tuir mai”, Anita Tavares hatete, iha Timor Plaza, ohin.
Nia dehan, prosesu investigasaun la’o hela no bainbain kazu ne’e nia prosesu dala ruma to’o fulan ida maibé depende ba kazu.
Nune’e Ministra Edukasaun, Dulce de Jesus Soares, husu ba Komisaun Funsaun Públika hodi suspende tiha nia serbisu nu’udar diretór eskola iha eskola rua referida.
“Ministériu Edukasaun imediatamente liuhusi inspesaun jerál halo levantamentu informasaun prelimináriu hosi informasaun ne’e ami enkamiña ba Komisaun Funsaun Públika, no ami husu ba Komisaun Funsaun Públika loke prosesu disiplinár halo suspensaun imediatamente ba infratór no ami mós tún ba eskola servisu hamutuk ho eskola sira atu atu trata estudante vítima ho di’ak no agora sira hotu iha ona eskola”, Ministra dehan.
Jornalista: Osória Marques
Editór: Evaristo Soares Martins
