DILI, 12 Marsu 2025 (TATOLI) — Governu liuhusi Ministériu Asuntu Kombatente Libertasaun Nasionál (MAKLN) rejista ona lista reklamasaun no kontestasaun rihun 14-resin.
“Ermera nian mai ona, ekipa téknika sei insert ba sistema no iha loron 14 remata ona, ne’ebé ami sei haree, ida-ne’ebé loos, sim no ida-ne’ebé mak sala ita pending lai”, Ministru Oan Soru hatete iha Palásiu Governu, kuarta ne’e.
Antes ne’e Ministru Oan Soru hatete, dadus provizóriu ba reklamasaun to’o dia 25 fulan-Fevereiru hamutuk 11,045, liuhosi CCLN entrega ba ministériu no agora despaxu ona ba tékniku sira hodi haree ninia prosesu tuir mai.
Prezidente Konsellu Kombatente Libertasaun Munisípiu Ermera, António Soares “Tatamailau”, dehan, veteranu Ermera nian submete ona ba MAKLN.
“Totál reklamasaun no kontestasaun hosi Ermera hamutuk 3.293, maibé iha lista balun ne’ebé sei liuhusi tán Señór Lima Lima, António dos Santos mak ha’u ladún hatene. Sira-nia ne’e lori ketak ba entrega iha nasionál. Ha’u bolu atu lori mai iha konsellu veteranu Ermera mak submete dala ida maibé nia lakohi”, Tatamailau informa.
Nia dehan, submete ona ne’ebé hein de’it nasionál bainhira mak taka tanba ida-ne’e sei iha prosesu naruk.
“Ami Ermera la’o tuir de’it saida mak nasionál haruka ne’ebé veteranu ne’ebé la satisfeitu ne’e halo ona reklamasaun no kontestasaun, ne’ebé loos ka lae ne’e nasionál mak hatene”, nia hetan.
Lista editál ne’ebé anunsia publikamente iha loron 15 fulan-Janeiru 2025, dahuluk, responsável sira ne’ebé mak atu verifika ne’e liuhosi juramentu ida.
Daruak, orientasaun ne’ebé mak MAKLN ho CCLN hasai, husu responsável sira atu la’o ho giaun ne’ebé kondús nune’e minimiza buat-ne’ebé mak lori tempu naruk.
Totál kombatente libertasaun neʼebé rejistadu hamutuk 124.782, ida-ne’e iha segundu rejistu 2009 nian, ne’ebé válida mak 10.249.
Jornalista: Osória Marques
Editór: Evaristo Soares Martins
