DILI, 12 Marsu 2025 (TATOLI)—Prezidente Parlamentu Nasionál (PPN), Maria Fernanda Lay, husu ba Tribunál hodi bele deside karreta sira ne’ebé antigu Deputadu hamutuk 35 utiliza iha lejizlatura liubá.
“Ha’u la hato’o keixa, tanba keixa ne’e Prezidente sira uluk mak hato’o, mas nia prova laiha, la fó dokumentu, foin lalais ne’e ha’u mak halo karta hodi bele rezolve karreta ne’ebé iha pose Deputadu sira nian, hakarak ka lakoi ne’e aset Estadu nian, klaru katak tenke iha desizaun ruma hodi bele rezolve problema ida-ne’e,” PPN hateten ba jornalista sira iha resintu Parlamentu Nasionál (PN), kuarta ne’e.
Notísia relevante : PPN keixa antigu deputadu 35 ne’ebé la entrega karreta ba PJR
Nia dehan, prosesu la’o hela, Prokuradoria Jerál Repúblika (PJR) antes ne’e husu ba PN atu kansela lailaun karreta.
“Sira (PJR) tenke hato’o bá Tribunál no Tribunál mak tenke hateten kansela, labele PJR,” nia akresenta.
PPN hatutan, antigu deputadu sira te ke entrega fali karreta sira tanba la re-eleitu.
Jornalista : Nelson de Sousa
Editora : Julia Chatarina
