KOVALIMA, 12 Marsu 2025 (TATOLI) – Sekretáriu Estadu dezenvolvimentu lokál , Mateus W. dos Santos husu líder lokál sira atu kontrola komunidade sira labele konstrui uma iha fatin sira ne’ebé risku.
Governante ne’e mós informa katak Parlamentu Nasionál (PN) aprova ona proposta medida tulela lei legalidade urbanístika nune’e iha tempu-badak sei halo sosializasaun ba lei referida ba lideransa komunitaria sira.
“Xefe suku labele autoriza ema halo uma arbiru tanba Ministériu planeamentu estratéjiku daudaun ne’e iha faze elaborasaun planu urbana. Ha’u la hatene dadaun ne’e halo ona mapamentu agrikultura ona ka la’e ”, Sekretáriu Estadu, Mateus W. dos Santos hateten, iha AMC, ohin.
Ho nune’e membru ezekutivu dehan, orientasaum atu halo mapamentu agrikultura halo ona ka seidauk ho intensaun atu hatene rai ne’ebé iha poténsia ba natar nune’e atu hasa’e produsaun iha rai laran tanba xefe suku sira haree no besik liu ba povu.
Ho nune’e , Governante mós fó hanoin ba xefe sira atu labele fa’an rai no kontrola komunidade sira labele halo konstruisaun uma arbiru.
“Sekretáriu Estadu Asuntu Toponímia Organizasaun Urbana (SEATOU) iha atu sobu bainhira setór importante ita la prioritiza tanba lei aprova ona husi Parlamentu Nasionál hein promulga husi Prezidente Repúblika ( PR) ita sei sosializa” nia dehan.
Iha sorin seluk, Xefe Suku Debos Agostino da Silva rekuñese nia komunidade sira iha Suku Debos balun konstrui uma iha fatin riksu sira hanesan Mota-ninin no foho-huun sira.
“Ha’u hatene ha’u-nia komunidade konstrui uma iha fatin risku sira hanesan líder lokál molok sira atu konstrui ami fó hatene nafatin konstrui uma tanba ho razaun la iha rai atu hela sira konsege konstrui uma iha fatin risku sira”, nia haktuir.
Líder komunitária ho nia estrutura sempre fó hanoin ba komunidade sira maibé sira nafatin seidauk iha konsiénsia nune’e komunidade obriga aan konstrui uma iha fatin risku hanesan mota-ninin no foho-huun sira.
Iha Suku Debos, xefe Suku ho nia estrutura identifika komunidade ne’ebé konstrui uma iha fatin risku mak hanesan iha aldeia Lakonak Besik konstrui uma iha foho-huun no mós mota-ninin , Asumaten iha mota-ninin, Lokeu konstrui uma iha foho-huun.
Fó hanoin Fali katak, iha 25 Fevereiru tinan ne’e, Parlamentu Nasionál aprova ona proposta-lei númeru 9/VI(a1) kona-ba medida tutela legalidade urbanístika iha finál Globál.
Proposta-lei referida tuir ezpozisaun motivu katak ho entrada vigór dekretu-lei númeru 9/2022, 24 Fevereiru ne’ebé estabelese rejime jurídiku edifikasaun no urbanizasaun no regula lisensiamentu konstrusaun no utilizasaun edifikasaun iha nesesáriu atribui ba Governu ferramentu legál adekuadu ne’ebé permite garante aplikasaun rejime ne’e.
Jornalista: Celestina Teles
Editór: Rafael Ximenes de A. Belo
