DILI, 12 Marsu 2025 (TATOLI) – Ministru Interiór, Francisco da Costa Guterres, aprezenta orgánika foun Servisu Migrasaun nian no hetan ona aprovasaun iha reuniaun Konsellu Ministru, ohin.
Tuir fonte husi Governu, reforma ida-ne’e mosu tanba nesesidade atu moderniza estrutura ne’ebé responsavel ba kontrolu fronteira no jestaun ba fluksu migratóriu iha Timor-Leste, nune’e bele garante efisiénsia boot liu iha jestaun ba fluksu migratóriu, hametin seguransa nasionál no hatán ba dezafiu atuál, hanesan aumentu mobilidade umanu no nesesidade ba kontrolu fronteira ne’ebé rigorozu liu.
“Ho orgánika foun ne’e, Servisu Migrasaun agora iha Diretór Ezekutivu ida no Diretór-Jerál na’in-rua ne’ebé responsavel ba área operasionál no administrativa, hodi garante jestaun ida ne’ebé ájil no efetivu liu”, nota ne’e esplika.
Ho estrutura interna sei reorganiza ba diresaun nasionál espesializada tolu no gabinete tékniku hitu, nune’e bele promove espesializasaun no efisiénsia ne’ebé boot liu.
Jornalista: Arminda Fonseca
Editora: Maria Auxiliadora
