DILI, 11 Marsu 2025 (TATOLI)–Embaixadór Timor-Leste ba Repúblika Koreia, António de Sá Benevides, Adidu ba Asuntu Traballadór, Calisto Pacheco no Asistente Adidu, José S.C vizita Human Resources Development Service of Korea (HRDK) iha Ulsan, Gyeongsang-do, Koreia Súl hodi ko’alia kona-ba kooperasaun serbisu.
Delegasaun husi Timor-Leste ne’e hasoru malu ho Prezidente HRDK, Lee Woo-young, Vise-Prezidente, Lim Seoung-mook, Diretór Jerál, Shin Seoung-gil, no Diretór Departamentu Planeamentu Traballadór Estrangeiru, Kwon Gi-sung.
“Diskusaun ne’e fó énfase atu aumenta oportunidade serbisu ba traballadór Timor-Leste, espesialmente iha setór konstrusaun no ospitalidade, konsidera sira-nia dedikasaun, forsa traballu no adaptasaun di’ak,” referidu nota ne’ebé Agência Tatoli asesu iha kuarta ne’e.
Notísia relevante : Traballadór timor-oan 867 iha Koreia Súl sei hetan renovasaun pasaporte
Iha oportunidade ida-ne’e, Benevides apresente-an hanesan Embaixadór foun Timor-Leste ba Koreia no hato’o agradesimentu kle’an ba HRDK, ne’ebé kontinua fó apoiu ba traballadór timoroan sira.
Aleinde ne’e, Embaixadór Benevides subliña nesesidade atu fortalese kapasidade téniku no formasaun profesionál hodi asegura katak traballadór timoroan kontinua kompetitivu iha merkadu traballu Koreia ne’ebé envolve merkadu laborál.
Iha sorin seluk, Prezidente HRDK, Lee Woo-young, komprometidu atu fó atensaun espesiál ba traballadór timoroan sira no rekoñese sira-nia esforsu no kontribuisaun ba Koreia.
Enkontru ida-ne’e mós hadi’a liután relasaun di’ak ne’ebé eziste entre Timor-Leste no Koreia iha área dezenvolvimentu forsa traballu atu kria oportunidade boot liu ba traballadór timoroan sira.
Sekretaria Estadu Formasaun Profisionál no Empregu (SEFOPE) haruka ona traballadór hamutuk 780 bá Koreia Súl iha tinan 2023 nia laran, ne’ebé na’in-576 serbisu iha peska no na’in-214 serbisu iha fábrika.
Enkuantu, traballadór timor-oan ne’ebé serbisu iha Koreia Súl hahú husi tinan 2009 to’o 2024 hamutuk 5.914, ne’ebé husi númeru ne’e fila ona mai Timor 1.046, enkuantu kontinua serbisu 4.822.
SEFOPE rejista traballadór hamutuk 1.225 ne’ebé serbisu iha Koreia Súl hahú husi tinan 2009 to’o 2023 sai ona husi sistema.
TATOLI
