DILI, 12 Marsu 2025 (TATOLI)—Diretór Servisu Apoiu Diagnóstiku no Terapeútiku Hospital Nacional Guido Valadares (HNGV), Vidal de Jesus, hateten tinan oin (2026) edifísiu pediatria andár lima no Unidade Kardiolojia Kuidadu Intensivu (ICCU-sigla portugés) bele uza halo tratamentu saúde.
“Agora daudaun, konstrusaun ba edifísiu foun pediatria no ICCU nian kompletu ona purvolta 40% resin. Ita hein katak tinan ida-ne’e nia rohan ka inísiu tinan 2026, bele entrega ona para HNGV uza,” Vidal de Jesus ba jornalista sira iha Hotel Timor, Dili, kuarta ne’e.
Nia haktuir, maski konstrusaun neineik maibé obra ne’e tenke la’o nafatin tuir kontratu ne’ebé determinadu.
“Karik iha kontratu hateten katak tenke entrega iha tinan oin, entaun tenke entrega. Karik hakarak estende konstrusaun, tenke hatama karta pedidu ida,” nia afirma.
Antes ne’e, Governu prevee orsamentu hamutuk millaun $9.3 ba konstrusaun referida no konstrusaun ne’e ho durasaun tinan rua, 2023-2025, neʼebé konstrui husi kompaña China Civil Engineering Construction Cooperation (CCECC).
Lansamentu ba pediatria andár lima no ICCU iha HNGV ne’e hala’o iha inísiu Janeiru 2023, husi VIII Governu Konstitusionál ne’ebé lidera husi Primeiru-Ministru, Jenerál Taur Matan Ruak.
Iha sorin seluk, Diretór Empreza China Civil Engineering Construction Cooperation, Liang Quing, kompromitidu katak sei konklui projetu ida-ne’e ho infraestrutura ne’ebé kualidade ba Governu no povu Timor-Leste.
Jornalista: Felicidade Ximenes
Editór: Xisto Freitas da Piedade
