Elizeu Isaac konsidera lidera RTTL hanesan responsabilidade la’ós oportunidade

DILI, 13 Marsu 2025 (TATOLI)—Prezidente Konsellu Administrasaun Rádio e Televisão de Timor-Leste, Eempreza Publika (RTTL. E.P) ne’ebé foin simu pose, Elizeu Isaac Fernandes, konsidera konfiansa ne’ebé fó ba nia lidera RTTL hanesan responsabilidade la’ós oportunidade, nune’e nia parte sei hala’o servisu ho responsabilidade.

“Ho onra boot no agradesimentu kle’an, ohin, ha’u hamriik iha ita-boot sira-nia oin nu’udar Prezidente Konsellu Administrasaun Rádio e Televisão de Timor-Leste empreza publika. Ha’u-nia apresiasaun kle’an ba IX Governu konstitusionál lideradu husi Primeiru-Minstru Kay Rala Xanana Gusmão ho elenku Governu tula konfiansa, fó mai ha’u kna’ar hanesan bibi atan ida ba haknaar iha RTTL, E.P hodi serbí Timor-Leste,” Elizeu Isaac hateten iha nia diskursu bainhira simu pose husi Ministru Prezidente Konsellu Ministru (MPKM), Agio Pereira, iha Palásiu Governu, Dili, kínta ne’e.

Nia hateten, Governu nia konfiansa ne’e inspira nia simu responsabilidade ho dedikasaun no kompromisu tomak.

“Ita-boot sira hotu ninia konfiansa no inspira ha’u simu responsabilidade ida-ne’e ho dedikasaun no kompromisu,” nia dehan.

 RTTL hala’o papél fundamentál iha ita-nia nasaun

Nia dehan, RTTL la’ós de’it fonte informasaun no divertimentu maibé nu’udar emisora ​​públika Timor-Leste nian, tanba RTTL ho misaun mak atu serbí povu ho konteúdu ne’ebé informativu, edukativu.

“Ita hotu iha responsabilidade atu garante katak RTTL sai nafatin instituisaun ida-ne’ebé kredivel no independente, ne’ebé tane aas valór lia-loos, transparénsia no integridade jornalístika,” nia dehan.

Nia promete atu serbisu kolaborativamente ho parte relevante hotu-hotu iha Timor-Leste.

“Hau ho Ekipa RTTL sei dedikadu, hakuak nafatin parseiru ajénsia nasioanl no internasional, ajénsia Governu nian, órgaun reguladór sira no importante liu, povu Timor-Leste,” nia hateten.

RTTL tenke adapta no halo inovasaun atu garante katak RTTL nafatin relevante no asesivel ba komunidade hotu-hotu, hahú husi sentru urbanu sira to’o área remota.

“Ho ha’u no ami hotu iha RTTL sei promove valór sira liberdade imprensa no jornalizmu ida-ne’ebé responsavél, hodi garante katak RTTL sai nafatin plataforma hetan konfiansa hodi fornese reportajen ne’ebé ekilibradu no loos. Ami sei apoia inisiativa sira-ne’ebé fó kbiit ba jornalista sira hametin literasia mídia no haburas envolvimentu públiku,” nia dehan.

Nia laran metin katak ho esforsu koletivu bele hasa’e RTTL ba nivel foun, nune’e mai servisu hamutuk hodi tane aas valór profisionalizmu, kreatividade no responsabilidade garante katak RTTL kontinua sai pilar vital ba demokrasia no identidade kulturál.

“Ba maluk sira hotu iha RTTL. EP, ha’u ba tan atu ita avansa hamutuk. Ha’u hakarak subliña ita-nia forsa mak iha serbisu ekipa, integridade no vizaun ida ho exelénte. Ha’u komprende dezafiu sira-ne’ebé ita hasoru husi avansu teknolójiku. Ha’u fiar metin katak ho inovasaun, paixaun no esforsu koletivu, ita bele ultrapasa dezafiu sira. Hateke ba edifísiu foun RTTL ho naran eroi boot David Alex Daitula, inspira no fanun, ita hotu deve ba dedikaasaun no sakrifisiu eroi sira-nian, sira-nia mate nakfilak ona rai nee sai nasaun,” nia hateten.

Nia mós bolu atensaun katak, jerasaun foun sira hakat ba oin hamutuk, haforte legadu sira-ne’ebé eroi sira husik hela, kuída halo di’ak liután tuir kapasidade husi jerasaun foun ida-idak ne’ebé hakna’ar aan iha RTTL, E.P.

“Ha’u mai atu ita hamutuk, serbisu ba futuru RTTL ida-ne’ebé ho kredibilidade, profisionalizmu, no kreatividade.  Ita-boot sira hotu ninia serbisu makaas mak sai hanesan adubu hodi kolleta RTTL ninia susesu,” nia hateten.

Iha tomada de pose ida-ne’e, Ministru Prezidénsia Konsellu Ministru, Agio Pereira, akompaña hosi Sekretáriu Estadu Komunikasaun Sosiál, Expedito Dias Ximenes, mak fó pose ba Prrzidente foun RTTL, E.P ne’e.

IMinistru Prezidénsia Konsellu Ministru, Agio Pereira, destaka kna’ar fundamentál RTTL nian nu’udár konsesionáriu ba servisu radiodifuzaun públika nian, repete kompromisu Governu nian ba modernizasaun empreza no reforsu komunikasaun sosiál iha rai-laran.

“RTTL nia misaun define ho klaru no envolve garantia servisu rádiu no televizaun ida-ne’ebé imparsiál, plurál no asesivel ba sidadaun hotu-hotu. Governu sei kontinua fó apoiu ba modernizasaun infraestrutura, atualizasaun teknolójika no formasaun ba profisionál empreza nian hodi haforsa kualidade informasaun no habelar nia kobertura iha nasionál,” Agio dehan.

Agio subliña, importánsia husi mídia independente no konfiável, RTTL tenke hala’o nafatin ninia kna’ar ho responsabilidade no kompromisu públiku.

“Ita hakarak RTTL ida-ne’ebé forte ba beibeik, inovativu no asesivel, ne’ebé promove ita-nia lian, ita-nia kultura no valór sira sidadania nian. Informasaun ho kualidade hanesan ai-riin ida ba demokrasia. Ita-nia rádiu no televizaun públika iha papél sentrál hodi habelar koñesimentu no promove debate públiku kona-ba ideia sira,” nia dehan.

Agio Pereira hatutan, nesesidade ba jestaun efisiente ba empreza no kompromisu husi ninia profisionál sira hodi promove atendimentu públiku.

“Modernizasaun RTTL tenke akompaña ho kompromisu ne’ebé la nakdoko ba étika jornalístika, rigór informativu no imparsialidade. Mídia tenke sai espasu ida-ne’ebé lian hotu-hotu iha oportunidade atu espresa sira-nia aan no iha ne’ebé sidadaun sira bele hetan informasaun ne’ebé konfiável no ekilibradu,” nia deklara.

Sekretáriu Estadu Komunikasaun Sosiál, Expedito Dias Ximenes, reforsa tan katak importánsia jestaun di’ak ba rekursu públiku no nesesidade atu garante funsionamentu efisiente RTTL, E.P nian.

“Empreza tenke respeita nafatin prinsípiu sira funsaun públika nian, garante jornalizmu ne’ebé independente, konfiável no asesivel ba timoroan hotu. Governu reafirma ninia kompromisu atu garante katak RTTL kumpre ninia misaun atu informa, eduka no promove identidade nasionál,” Expedito dehan.

Nomeasaun ba Elizeu Isaac Fernandes formaliza hosi Konsellu Ministru liuhosi Rezolusaun Governu Nú. 15/2025, loron 17 fulan-Marsu, hodi troka José António Belo ‘Taraleu’, ba ne’ebé Ministru no Sekretáriu Estadu hato’o sira-nia rekoñesimentu ba ninia serbisu no dedikasaun durante ninia mandatu tomak.

Iha serimónia ne’e partisipa mós husi Ministru Planeamentu no Investimentu Estratéjiku, Gastão Francisco de Sousa, Vise-Ministru Asuntu Parlamentár, Adérito Hugo da Costa, Prezidente Konsellu Administrasaun Ajénsia Tatoli, Noémio Mateus Soares Falcão, nune’e mós dirijente no reprezentante husi mídia sira.

Biografia badak

Elizeu Isaac Fernandes, moris iha Same, iha loron 13 Marsu 1986, hanesan Xefe Gabinete Sekretáriu Estadu Komunikasaun Sosiál, ne’ebé iha esperiénsia profisionál hanesan asesór mídia no komunikasaun iha Gabinete Ministru Administrasaun Estatál entre 2018 no 2020.

Sai mós hanesan ofisiál mídia iha Gabinete Sekretaria Estadu ba Apoia Sósiu-Ekonómiku iha tinan 2017 to’o 2018.

Aleinde ne’e, hanorin mós iha Universidade Nacional Timor Lorosa’e (UNTL), iha Fakuldade Siénsia Sosiál, iha Departamentu Komunikasaun Sosiál entre 2013 no 2018.

Iha 2013 to’o 2017, hala’o kna’ar nu’udár ofisiál mídia iha Diresaun Nasionál Promosaun Sósiu-Ekonómiku Muller iha Sekretaria Estadu Promosaun Igualdade.

Prezidente foun RTTL ne’e hasai nia kursu mestradu iha Universitas Dr. Soetomo, Surabaya-Indonézia, iha Fakuldade Komunikasaun Sosiál no kursu lisensiatura iha Sekolah Tinggi Ilmu Komunikasi, Semarang-Indonézia.

Notísia Relevante: Elizeu Isaac Fernandes asume knaar nu’udar Prezidente foun RTTL, E.P

Jornalista : Hortencio Sanchez

Editór        : Cancio Ximenes