VIKEKE, 13 Marsu 2025 (TATOLI)—Koodenadór Bee Timor Leste, Empreza Públika (BTL, E.P) munisípiu Vikeke, Marito da Costa, informa hahú husi Janeiru to’o Marsu ne’e BTL Vikeke konsege rekolla taxa fornesimentu bee-moos hamutuk $5,514.20 hodi kontribui ba kofre Estadu.
“Reseita ne’e ami rekolla metru kontadór ne’ebé monta ba komunidade iha kapitál Vikeke nian,” Marito da Costa hateten ba Agência TATOLI iha nia kna’ar fatin, Beloi, ohin.
Reseita ne’ebé BTL rekolla liuhusi fornesementu bee-moos iha kada fulan mak hahú husi fulan-Janeiru BTL Vikeke rekolla taxa $2,444, Fevereiru rekolla $2,703.20 no Marsu BTL Vikeke rekolla $367.00.
Aleinde ne’e, Koodenadór BTL, E.P munisípiu Vikeke ne’e subliña, BTL, E.P munisípiu Vikeke instala ona metru kontadór hamutuk 659 totál kliente populasaun hamutuk 5.637 ne’ebé monta iha zona Belo, Bromatan, Cabira-oan no Lamak Laran suku Caraubalu postu Vikeke Vila.
“Iha kapitál Vikake Vila ne’e ami monta kontadór hamutuk 659, ba área Olobai nian ami sei order metru kontadór, bainhira to’o Vikeke ami kontinua instala ba área sira-ne’ebé seidauk instala metru kontadór,” nia dehan.
Nune’e, nia dehan, dezafiu ne’ebé BTL, E.P munisípiu Vikeke enfrenta distribuisaun bee ba zona sira-ne’ebé dook husi tanke konservatóriu sentrál nian.
“Ita labele kalkula oras distribuisaun nian tanba ita-nia kanu distribuisaun kauze tuan hotu ona no balu kuak. Nune’e, sai difikulta ba distribuisaun bee ba zona sira-ne’ebé distánsia dook. Tan ne’e, iha tinan kotuk ami halo planu hodi troka kanu distribuisaun nian, maibé planu sira-ne’e ita-nia Governu pendente tiha tanba ne’e ita labele implementa,” nia dehan.
Nia dehan, ba oin BTL, E.P Vikeke kontinua tau ba prioridade ba dezafiu sira-ne’e, atu rezolve kanu distribuisaun referidu.
Daudaun ne’e, rekursu ka funsionáriu iha BTL, E.P munisįpiu Viqueque na’in-14 hodi halo atendimentu bee-moos ba komunidade kapitál Vikeke Vila.
Jornalista : Vitorino Lopes da Costa
Editór : Cancio Ximenes
