DILI, 13 Marsu 2025 (TATOLI)—Diretór Nasionál Apoiu Servisu Saúde Ministériu Saúde (MS), Carlos de Carvalho Guterres, hateten durante fulan Janeiru to’o Marsu tinan ne’e, Ministériu Saúde (MS) transfere pasiente na’in-14 ba ospitál Malázia no Singapura.
“Ita haruka pasiente na’in 14 bá ospitál sira iha Malázia no Singapura hodi hala’o tratamentu saúde,” Carlos de Carvalho dehan ba TATOLI iha ninia kna’ar fatin, Kaikoli, kinta ne’e.
Nia esplika, pasiente na’in-14 ne’e enfrenta mós kankru no fuan no entre númeru referidu, na’in rua iha Singapura (ida mate tanba kardiovaskulár no ida sei hala’o hela tratamentu) no Malázia iha 12 (tolu alta, hela sia mak sei hala’o tratamentu).
Antes ne’e, Prezidente Junta Médika iha Hospital Nacional Guido Valadares (HNGV), Nuno Vital Soares, hateten HNGV halo hela avaliasaun ba dokumentu pasiente pendente hamutuk 30-resin.
“Tuir ha’u-nia hatene, tinan kotuk iha pasiente pendente hamutuk 30-resin. Ami fó filafali dokumentu bá departamentu idak-idak hodi haree filafali sira-nia kondisaun ikusliu. Hanesan hatene katak referrál pasiente nian adia tanba problema ho ospitál iha rai-li’ur, entaun konfirma ona husi Junta Médika haree tuir númeru kontatu ne’ebé mak iha, kontatu fali sira nune’e sira mai halo fali ezaminasaun ba sira-nia kondisaun,” Nuno Vital dehan ba jornalista sira, iha HNGV, Bidau, kinta ne’e.
Nia haktuir katak pasiente sira-ne’ebé hetan aprovasaun husi Junta Médika atu halo referrál haree husi moras ne’ebé sira sofre, liuhusi departamentu idak-idak iha HNGV.
“Ita nunka prepara pasiente, maibé husi departamentu idak-idak iha HNGV. Tanba ne’e, bainhira sira deside katak pasiente sira-ne’e tenke halo ezame, la’ós haree husi númeru, maibé desizaun husi departamentu sira-ne’ebe eziste,” nia hateten.
Nuno esplika katak Junta Médika nia kna’ar mak atu haree pasiente ne’e tenke refere ba ospitál estranjeiru hodi halo tratamentu saúde ka lae.
“Junta Médika nia kna’ar mak kontinua halo tratamentu ne’ebé iha ona no Junta Médika iha autoridade atu halo enkontru hodi deside pasiente ne’e bele lori bá rai-li’ur ka lae, ho prosedimentu tuir kazu ne’ebé iha,” nia dehan.
Tuir dadus Diresaun Nasionál Apoiu Servisu Saúde, durante tinan 2024, Ministériu Saúde halo transferénsia pasiente hamutuk 347 ba ospitál estranjeiru hanesan Indonézia, Malázia no Singapura.
Husi númeru ne’e, pasiente refere ba Malázia hamutuk 157, Singapura 54 no Indonézia 136.
Jornalista: Felicidade Ximenes
Editór: Xisto Freitas da Piedade
