DILI, 13 Marsu 2025 (TATOLI) – Ministériu Edukasaun (ME), kuarta ne’e, fó-sai ba bolsa kandidatu faze daruak husi númeru seriesaun 1-224 atu submete dokumentu komprovativu hodi hetan kolokasaun.
“Ita iha vagatura 224, nune’e na’in-11 ba ensinu báziku no na’in-213 ba Pre-eskolár nian. Hahú aban bolsa kandidatu faze daruak submete dokumentu. Aban husu sira atu konfirma sira-nia naran ne’ebé fó-sai ona iha fatin ne’ebé koloka ba ne’e, sira haree no aseita ka la aseita, desizaun iha sira”, Diretór Nasionál Rekursu Umanu, João Amaral, hatete, iha nia knaar fatin Ministériu Edukasaun, Vila Verde, kuarta ne’e.
Nia hatutan, bainhira kandidatu ida mak la aseita ne’e la’ós la koloka ona maibé sei mantein ho númeru seriesaun ne’ebé iha.
Bazeia ba Despaxu omologasaun Ministra Edukasaun ho númeru 044/GM-ME/VIII/2024, loron 23 Agostu 2024 ne’ebé aprova bolsa kandidatu ba grupu rekrutamentu siklu 1 no 2 Ensinu Báziku ho kandidatu 2.441.
Nune’e mós bazeia ba Despaxu Ministra nian númeru 5/2025 loron 13 Fevereiru 2025 ne’ebé aprova atualizasaun lista finál integrasaun bolsa kandidatu ho total hamutuk 1.296.
Bazea ba despaxu ministeriál númeru 09/2025 de 12 de marsu, kona-ba xamada ba kandidatu integradu iha bolsa kandidatu ba grupu rekrutamentu primeiru no segundu siklu ensinu báziku atu okupa vagas iha kuadru pesoal edukasaun ensinu pre-eskolár no ensinu báziku.
Nune’e Diresaun Nasionál Rekursu Umanu aviza ba kandidatu sira, husi númeru 1 to’o 224 atu hare avizu kolokasaun tuir despaxu ministeriál 09/2025 loron 12 marsu ba kandidatu sira.
Ba kandidatu sira-ne’ebé konkorda ho kolokasaun referida atu mai asina termu aseitasaun xamada molok integra ba karreira dosente no submete dokumentu komprovativu sira hanesan sertidaun RDTL, Billete Identidade ka Kartaun Eleitorál, atestadu médiu husi HNGV, diploma mínimu baxarelatu ne’ebé legalizadu husi Ministériu Ensinu Superior, Siensias no Kultura, konta bankária no dokumentu sira seluk.
Jornalista: Osória Marques
Editór: Evaristo Soares Martins
