DILI, 14 Marsu 2025 (TATOLI)—Diretór Servisu Saúde Autoridade Administrativu Ataúru, Dano Pires de Sousa, hateten durante tinan 2018 to’o 2024, pasiente husi Illa Liran, distritu Maluku Oeste, provínsia Maluku, Indonézia, hamutuk 15 halo tratamentu gratuitu iha Ataúro.
“Tinan ida-ne’e ita seidauk atende pasiente husi Liran, maibé tinan kotuk 2018-2024, ita atende pasiente husi Liran hamutuk 15,” Dano Pires de Sousa hateten ba TATOLI iha Ataúro, sesta ne’e.
Nia dehan, dalaruma pasiente sira-ne’e balun mai ho karta referrál (rujukan) no balun lae, maibé karik pasiente sira iha sala maternidade labele hetan tratamentu, sentru saúde Ataúru referrál ba Hospital Nacional Guido Valadares (HNGV).
Nia dehan, pasiente sira-ne’e balun inan isin rua no balun sofre moras tuberkuloze, hepatitis, diabetes no seluk tan.
“To’o oras ne’e pasiente husi Liran halo tratamentu iha Ataúru ho gratuitamente tuir ita-nia sistema saúde. Entaun, ami simu pasiente sira-ne’e tanba pasiente sira-ne’ebé mai ona iha-ne’e posivelmente labele rejeita. Tanba ne’e, ho maneira umanitária ita mós fornese fasilidade atendimentu ne’ebé hanesan,” nia haktuir.
Entretantu, Diretór Servisu Nasionál Emerjénsia Médika no Ambulánsia (SNAEM, IP), Simplício Amaral de Deus, informa katak loos duni to’o oras ne’e aviaun Ministériu Agrikultura no Floresta (MAF) mós durante ne’e halo transferénsia ba pasiente Maluku sira-ne’ebé halo tratamentu iha Ataúru mai iha HNGV.
“Populasaun iha hela fronteira ho Ataúru ne’e maioria família. Dalaruma sira bá halo tratamentu iha Ataúro uza ró, tanba ne’e pesoál médiku sira iha sentru saúde Ataúru haree katak se pasiente ne’e ho kondisaun krítika no presiza halo referénsia ba HNGV, entaun sira mós presiza ita-nia aviaun ambulánsia tula mai nasionál,” nia tenik.
Tuir dadus husi HNGV durante tinan 2024, pasiente referrál husi Ataúru hamutuk 127.
Jornalista: Felicidade Ximenes
Editór: Xisto Freitas da Piedade
