VIKEKE, 14 Marsu 2025 (TATOLI)—Autoridade munisípiu Vikeke, sesta ne’e, fó pose ba estrutura no prezidente Asembleia Postu Administativu (ASPA) Uatulari ba mandatu períodu 2025 to’o 2027.
Sekretáriu munisípiu Vikeke asuntu Planeamentu Investimentu Dezenvolvimentu Integradu (PIDI), Acacio Sarmento, fó pose ba prezidente ASPA Uatulari, atuál administradór postu Uatulari Jorge Ribeiro no membru hamutuk na’in-29.
Acacio Sarmento hateten, autoridade munisípiu akompaña no fó pose ba estrutura no membru ASPA Uatulari, ba establesementu ASPA ne’e hodi foti desizaun sira liuliu ba problema sira iha postu administrativu Uatulari hodi tau ba planu perioridade.
“Ohin, ha’u mai akompaña no pose ba membru ASPA sira, tanba servisu ASPA nian atu rekolla programa prioridade sira husi aldeia no suku atu aprezenta iha asembleia postu hodi halo votasaun. Sira partisipa iha votasaun, membru sira mak iha diretu ba vota planu prioridade ne’ebé mai husi aldeia no suku. Tanba ne’e, ha’u husu estrutura no membru ASPA sira esforsu hodi la’o iha povu nian leet hodi haree preokupasaun sira,” Acacio Sarmaneto hateten iha serimónia pose iha postu Uatulari, ohin.
Autoridade ne’e dehan, bainhira estrutura no membru ASPA aprova ona planu prioridade postu Uatulari nian sei kontinua lori ba munisípiu hodi hetan aprovasaun iha Konsellu Konsultivu Munisipál Vikeke.
“Tanba ne’e, papel ASPA iha postu Uatulari sai importante, nune’e komesa agora ba oin hahú halo servisu identifika planu prioridade komunidade nian iha aldeia no suku sira atu lori ba suku no ba postu halo aprovasaun. Nune’e, ha’u husu estrutura no membru ASPA sira labele husi servisu tanba destinu postu Uatulari iha imi nia liman, imi mak foti desizasaun,” nia dehan.
Nia dezafia membru ASPA Uatulari esforsu no pasiénsia hodi rekolla dadus prioridade husi komunidade iha postu Uatulari nian.
Iha fatin hanesan, Administradór postu Uatulari, Jorge Ribeiro, promote katak estrutura ASPA Uatulari sei tau prioridade ba estrada, edifísiu eskolár, postu saúde no programa príoridade sira seluk ne’ebé komunidade enfrenta iha baze.
” Ami sei tau prioridade ba estrada, eskola, saúde no programa sira seluk ne’ebé mak suku, aprezenta mai postu hodi estrutura no membru ASPA postu Uatulari halo votasaun. Nune’e planu prioridade sira-ne’ebé liu iha votasaun ami sei kontinua lori ba munisípiu,” nia hateten.
Nia konsidera, establesementu ASPA iha Uatulari sai hanesan faze preparasaun ba poder lokál no dezentralizasaun munisípiu Vikeke nian.
Iha serimónia pose ba asembleia Postu Administrasaun Uatulari hamutuk na’in-29 kompostu husi xefe suku na’in-ualu (8), lia-nain suku ualu (8), juventude feto no mane husi suku, partidu polítiku no veteranu ho mandatu durasaun tinan rua.
Serimónia ne’e partisipa husi diretór serbisu munisípiu Vikeke, Komadante Polísia Nasionál Timor-Leste (PNTL) Eskuadra Uatulari no funsionáriu postu Uatulari.
Jornalista : Vitorino Lopes da Costa
Editór : Cancio Ximenes
