DILI, 14 Marsu 2024 (TATOLI) – Baleia kaxalote ne’ebé mate iha tasi Ulmera, iha postu administrativu Bazartete, munisípiu Likisá ne’e kuaze metru 18 to’o 19 no nia pezu estimadu tonelada 45.
Diretór Agrikultura munisípiu Likisá, José Pereira de Jesus, informa katak kauza husi baleia ne’e mate, tanba deskonfia han buat moris ruma hodi afeta ba nia kurasaun no seluk mak xoke ahu-ruin hodi hakanek nia isin tanba nia iha tasi ne’ebé ladún kle’an.
Nia salienta katak bainhira baleia ne’e mate peskadór sira koko kesi tali atu dada mai rai-maran, maibé labele tanba todan loos.
“Ohin, ami to’o bá ema mós ko’a tiha ona nia isin balun, maibé ha’u informa hela katak imi bele asegura hela, labele ko’a tan, [tanba] ikan ne’e mate seidauk hatene nia kauza loloos”, José Pereira de Jesus dehan ba TATOLI via telefone, ohin.
Nia salienta katak daudaun nia parte halo hela esforsu hodi liga ba ministériu no Bombeiru atu dada sai ikan ne’e ba rai-maran.
Tuir informasaun husi peskadór Ulmera, horisehik pur volta tuku 16h00 hetan baleia ida iha tasi-laran no ema barak mak bá haree no iis sei iha, enkuantu iha kalan ikan ne’e mate.
Notisia relevante: Ikan Baleia ida mate iha tasi Ulmera
Jornalista: Arminda Fonseca
Editora: Maria Auxiliadora
