DILI, 14 Marsu 2025 (TATOLI)—Bee Timor-Leste, Empreza Públika (BTL, E.P) asina kontratu ho kompañia lima hodi implementa projetu melloramentu sistema bee-moos iha postu lima iha munisípiu tolu, ho durasaun fulan-neen.
“Ita halo serimómia asina kontratu Bee Timor-Leste ho kompañia manán-na’in ba projetu kanalizasaun ka melloramentu sistema bee-moos iha kapitál postu lima, ida mak postu Balibo, Hatolia-A, Hatolia-B, Iliomar no Lautein,” Prezidente BTL, E.P, Gustavo da Cruz, informa ba jornalista sira iha edifísiu sentrál BTL, Kaikoli.
Ekipa husi BTL,E.P antes ne’e halo ona prosesu aprovizionamentu iha tinan kotuk, nune’e konsege hetan kompañia kualifikadu hodi implementa projetu.
“Ninia finalizasaun maka ohin ita bele selebra kontratu hamutuk iha ne’e, ho totál orsamentu ba kompañia lima ne’e millaun $3,1,” nia akresenta.
Notísia relevante : BTL,E.P-Autoridade Uatucarbau lansa projetu sistema bee-moos ba uma-kain 985
Ekipa avaliasaun dokumentu konsidera kompañia lima ne’e mak prienxe kriteriu.
“Sira ne’ebé manán ne’e hanesan kompañia mais mellor ka the best one, sira mak konsege konvense liu kompara ho sira-nia maluk ne’ebé kompete iha prosesu ne’e. Husu sira atu hatudu sira-nia kapasidade di’ak liu hanesan saida mak sira halo iha prosesu aprovizionamentu ne’e,” nia katak.
Prezidente empreza públika dehan, ba oin sei koloka ekipa téknika iha terrenu hodi halo akompañamentu ba implementasaun projetu.
Implementasaun projetu melloramentu sistema bee-moos iha Hatolia A sei implementa husi kompañia JOHJU BIA MUAS II Unip, Lda ho kustu projetu $620.193,36, enkuantu iha Hatolia B sei implementa husi kompañia CYRUS Unip, Lda ho kustu $424.515,42, iha postu Balibo implementadór mak Leo Hara Unip, Lda ho kustu $677.781,20, iha postu Iliomar sei implementa husi kompañia Marju Co, Lda ho kustu $749.177,80, no postu Lautein husi kompañia May Moco Unip, Lda ho kustu $636.480,50.
Jornalista : Alexandra da Costa
Editora : Julia Chatarina
