KOVALIMA, 14 Marsu 2025 (TATOLI) – Kandidatu traballadór Austrália na’in-270 ne’ebé rejista naran iha Sekretaria Estadu Formasaun Profesionál no Empregu (SEFOPE), Kovalima tuir ona formasaun dalen inglés ba faze segundu iha munisípiu Kovalima.
Diretór SEFOPE Kovalima, Stefanus Segundo Manek informa, kandidatu traballadór tuir kursu dalen inglés ba segundu faze hahú hala’o abertura ona iha loron 10 Marsu ne’e nune’e daudaun ne’e kursu Inglés hela.
“Ami fó sai avizu iha postu administrativu hotu kona-ba kandidatu traballadór atu tuir kursu dalen Inglés hamutuk 270, maibé depende balun rejista iha ne’e tuir kursu iha fatin seluk entaun ita bele prenxe ho sira seluk”, Stefanus Segundo Manek, relata ba TATOLI, iha Tabakolot, ohin.
SEFOPE fasilita kursu dalen Inglés hahú ona, maibé SEFOPE mós fasilita karta transferénsia ba kandidatu traballadór tuir kursu lian Inglés iha nasionál nune’e bainhira finaliza kursu sira bele simu sertifikadu.
SEFOPE Kovalima hahú hala’o abertura kursu Inglés ba segunda faze tanba bazeia ba orientasaun husi SEFOPE Nasionál.
Prosesu fasililita kursu formadór sira fahe formandu dalén Inglés valór sufisente, poor ho verry poor ketaketak ne’ebé sei tuir kursu fulan tolu durante oras rua ne’e, formadór husi SEFOPE rasik mak halo rekrutamentu.
“Ami SEFOPE Kovalima ezekuta de’it orientasaun husi Nasionál bainhira kandidatu traballadór tuir kursu durante fulan tolu finaliza ona hafoin bele simu ona sertifikadu”, ezekutivu ne’e dehan.
Kandidatu Traballadór ne’ebé mak atu tuir kursu dalen Inglés fatin iha Eskola Tékniku Vokasionál Akar Laran uza sala-de-aula rua lokaliza iha Suai Loro no sala-de-aula ida sei uza husi SKA lokaliza iha Tali-oan.
Fó hanoin fali katak, Sekretaria Estadu Formasaun Profesionál no Empregu (SEFOPE), fó teste ba kandidatu traballadór husi Kovalima hamutuk 3,184 iha loron 02 Marsu 2024 ne’e.
Enkuantu tuir dadus, timor-oan ne’ebé konkorre vaga liuhosi sistema online iha territóriu hamutuk rihun-51 inklui mós kandidatu traballadór husi munisípiu Kovalima.
Jornalista: Celestina Teles
Editór: Rafael Ximenes de A. Belo
